Caritas International a ning baw Cardinal Tagle Bangladesh Mungdan Na Rohingya Tsin Yam Hkrum Masha Ni Hpang De Sa Du Gawan

Mungkan ting hte seng ai Kahtawlik Nawku hpung a garum ning tum wuhpung rai nga ai Caritas International a ning baw Caridanal Luis Atonio Tagle Bangladesh Mungdan (Bangali) Rohingya tsin yam dabang ni de sa du gawan lam galaw nna, tsin yam hkrum nga ai Muslim masha ni hpe matut garum ya na matu Mungkan Mungdan ni hpe tsun lajin ai lam galaw dat nga ai.

Philippine Mungdan Manila Saradaw kaba Cardinal Tagle a 2 ya aten la nna Bangladesh Mungdan de sa du gawan ai shi a hkrun laman, December praw 3 ya shani Cox’s Bazar ginwang de sa du nna tsin yam hkrum masha ni, shanhte hpe garum ya nga ai Cariats magam gun ni hte kaga wuhpung uhpawng shagu na magam gun ni, bai dai ginwang na Mung up du ni hte hkrum shaga ai lam ni galaw lai wa ai rai nga ai.

Bangladesd asuya kaw nna Cox’s Bazar ginwang hta Rohingya wan mi jan daram hpe shingbyi shara jaw da ai, dai ni hta na malawng maga gaw 2016 hte 2017 lapran Maynamar Mungdan Rakhine Mungdaw hta byin lai wa ai kasat gala mang hkang lam ni a majaw hprawng ru wa ni rai ma ai re, nga ai. Cardinal Tagle kaw nna tsin yam hkrum masha hting gaw tsawmra mi hte hkrum shaga ai lam galaw lai wa ai.

“Ndai tsin yam dabang de du shang wa ai shaloi kabu ai hte yawn ai lam hpan lahkawng hkam sha lu nngai, kabu ai ngu ai gaw ndai masha ni shanhte lu la ang ai, lu la gying ai shanhte a sari hpa manu shadan ya, yu lakawn ya nga ai ni nga nga ma ai hpe mu ai majaw kabu ai, yawn ai lam gaw, ndai masha ni ndai shara kaw shanu nga ra ai gaw chyahkring chyahkra sha rai kun, shing nrai prat tup wa ndai zawn nga nga ra na ma ai kun, ngu ai lam hpe myit mau nga ai majaw rai nga ai, kashu kasha ni hku nna shanhte a shawng lam myit mada shara gaw hpa mi rai kun, ngu nna kanu kawa ni hpe lama san yang kanu kawa ni kaning ngu tsun na ma ai kun, ngu ai hpe myit yu pyi nhkawn ya nga ai” nga nna shiga dap ni de Cardinal Tagle tsun dat nga ai.

Mang hkang nnan byin hpang wa ai 2017 August shata kaw nna Kutupalong tsin yam dabang hta Caritas kaw nna garum ningtum lam ni galaw ya lawm nga ai rai yang dai ni du hkra American dollar wan 9 (US $ 9.0 millions) daram garum ya nga sai, tsin yam hkrum hting gaw 40,000, masha hku rai yang 240,000 daram hpe Caritsa kaw nna malu masha lajang garum ya ai, kaga htinggaw 10,000 daram hpe gaw malu masha nre ai kaga arung arai ni garum ya ai, bai shingbyin shara ginsum 1,000 hpe mung Caritsa kaw nna gaw gap garum ya sai re lam, Ucan shiga dap kaw nna shana dat nga ai.    

Source : UCANNEWS