Cardinal Turkson gaw Roma kaw na Alban Hills mayan nga ai camp ni hta sa du gawan ai gaw Wa Sarabyin Francis sa du gawan ai zawn hkam sha shangun na matu re nga nna tsun dat nga ai shiga

June 13, bat kyu ya shani Cardinal Turkson gaw Roma kaw na Alban hills mayan nga ai camp ni hta sa du gawan let camp kaw nga ai masha marai 600 daram hpe Covid – 19 makawp arung arai ni garan gachyan ya lai wa ai. Garan gachyan arung arai ni gaw myi man magap mask ni, ta laraw ni hte tsi ni re ai lam chye lu ai.

Cardinal Turkson gaw kahtawlik nawku hpung na the Prefect of the Discastery for Promoting Integral Human Development, shinggyim bawngring masa shatsaw sharawt daju hta na ningbaw rai nga ai. Shi sa gawan ai camp nga masha ni hta asak naw kaji ai hte gaw, htam lahkawng hta na langai mi lahta de nga ma ai hte matsan mayan nga yak taw ma ai re lam chye lu ai.

Cardinal shi hkum nan arung arai gam garan ya nna, shanhte a lapran arau nga ai a marang e, malap da hkrum ai matsan masha ni hpe garum chye na myit masa nga hkra shadan shadawng ya nga ai.

Italy mungdan hta Covid -19 makawp arung arai hte tsi ni grai naw ra ahkak taw ai rai nna, asak masum ning lawu na ma ni hpe madung da garum na lam grai ra taw nga ai lam chye lu ai.

Wa Sarabyin Francis hkring hkring tsun ai “Kadai hpe mung n’mai ngam da ai” ngu ai ga hpe Cardinal madi shadaw ai lam hpe ta tut magam galaw nna bying mai ai ni hpe shang lawm na matu saw shaga nga ai rai nga ai.

Alban bum mayan camp ni hta nga ai ni, hka hpe grai tsan ai kaw na mawdaw hte htaw lang ra ai rai nna, electric wan mung n nga ai daram rai nga ai. Ma ni hte na tsa shadang 15% daram hpaji jawng lung lu ma ai.

Computer hte internet line ni nnga ai dai shara ni hta, ya na zawn Covid -19 tsin-yam hkrum wa ten grau nna ma ni a matu, laika hpaji sharing la na nmai bying mat sai. Cardinal shi hkrum nan nta nhku kata hkan shang hkawm ai hte kanu, kawa ni tsun dan ai hkam sha lam ni hpe hkam sha lawm, n gun jaw lai wa sai.

Dai kaw nga nga ai masha law malawng gaw Bosnia majan tsin-yam hkrum ai majaw hprawng nga ai ni rai ma ai rai nna, asuya tara shang machyu nga ai ni mung nrai ma ai majaw, masat shadang tawn hpyen yen ni a madang pyi nnga ai ni rai ma ai. Cardinal dai zawn sa du gawan nna, garum pahtau lam galaw let shanhte a hkam sha lam ni hpe madat hkam sha lawm, n gun jaw ai lam galaw ai gaw Wa Sarabyin hkum nan shanhte kaw sa du gawan ai hpe hkam sha shangun ai lam rai nga ai nga nna Vatican Shiga dap kawn ndau da ya nga ai.

13 June 2020, 19:30

https://www.vaticannews.va/en/vatican-city/news/2020-06/turkson-itinerant-peoples-rome-alban-hills-covid-19.html

Translated By Fr. Patrick Hkawng Yae

https://www.rvasia.org

Website - kachin.rvasia.org/

Social Media -facebook- RVA kachin, wechat, viber, Instagram, Twetter, youtube

#churchnews
#rvakachinservice