Cardinal George Pell Hte Seng Nna Australian Tara Rung Kawn Daw Dan Ai Lam Hpe Vatican Hkap La

Ahkyak dik ai Vatican magam dap kaw du hkra magam lit la lai wa yu sai Australia Cardinal George Pell gaw lai wa sai shaning 20 jan ning daram hta hkum shan roi rip lam tara tawt lai ai lam dan dawng ai nga nna February shata 26 ya shani Australia Mungdan Victoria tara rung daju kaw nna je yang daw dan ai lam hpe Vatican kaw nna hkap la ai lam chye lu ai.

Cardinal George Pell hku nna Shi hta mara nnga ai ngu tara rung daju de tang madun bang da ai tang shawn lajin lam hpe August 21, bat masum ya shani Australia Mungdan, Victoria tara rung daju kaw nna nhkap la ai ning dang lam galaw dat ai hpang Vatican a ning mu hpe ndau shapraw ai lam rai nga ai.

Vatican ndau shapraw dat ai ndau laika hta, “Ausralia Mungdan a tara je yang ai lai htung masa hpe Nawku Hpung kaw nna tut e hkap la manu shadan ai, Cardianal Pell kaw nna tara rung daju de tang shawn lajin da ai lam hpe tara rung kaw nna ning dang dat ya ai daw dan lam hpe mung Nawku hpung hkap la ai, ndai tara je yang ai mabyin tsang ning gam shagu hta Cardinal George Pell hku nna mung shi hta mara nnga ai lam dingrun atsun nga ai, tara rung daju tsang ht tsang de tang shawn hpyi lajin lam galaw na mung shi a ahkaw ahkang rai nga ai, ndai aten hta Vatican hku nna hkum shan roi rip hkrum lai wa ai masha ni hte rau ni ni htep htep myit hpawm nga ai, hkum shan roi rip lam tara tawt lai ai jau ni hpe ahkyak la lu hkra galaw na matu myit daw dan let shakut da ting nga ai Australia Nawku hpung hte mung Vatican myit hpawm nga ai” nga nna ndau shapraw lam Vatican galaw dat nga ai.

Source : Vatican News