Vatican kaw na Wa Sarabyin Francis  matsun ai hte maren, Myitkyina Sasana, Saradaw Ginwang hpe gan yu reng uphkang na matu, Yangon Saradaw Kaba, Cardinal Charles  Maung Bo gaw Myitkyina de nhtoi 6 December shata 2020 ya shana du shang wa ai re.

Cardinal du shang wa ai shaloi San Columban Cathedral Nawku Jawng dingsi hpe dum let hkap tau la ai. Covid-19 kap bra ana byin nga ai ten re majaw, Hpung masha ni hku nna Cardinal hpe laksan hkaptau hkalum la ai lam gaw n galaw lu shi ai re.

Myitkyina Sasana a Sagurem wa rai nga ai, Wa Saradaw Francis Daw Tang gaw, asak kaba nna hkring sa ten ni wa sai hte Nawku Hpung gaw da tara hte maren, shi hkum nan Sarabyin Rung de hkring sa ahkang hpyi laika bang da ai hpe Wa Sarabyin kawn hkap la nna hkring sa na ahkang jaw dat sai rai nga ai.

Cardinal gaw  Apostolic Administration ngu ai Nawku Hpung a Dakkasa hku nna Sasana Ginwang hpe yu reng uphkang ai magam lit hte numbat langai lang Myitkyina sasana de sa du gawan ai lam rai nga ai

Dai majaw  Wa Saradaw Francis a malai Saradaw ningnan n lu shi ai aten du hkra Myitkyina Sasana hpe Cardinal Charles Bo hku nna yu reng up hkang mat wa na re lam chye lu ga ai.

Saradaw du wa ai lam hte seng nna Wa Saradaw Francis Daw Tang hpung masha ni hpe lai wa sai laban shani  tsun ai hta,

“ Wa Saradaw kaba Cardinal hpe hkap tau hkalum ai lamang hpe Cardinal du ai hpang shi hte jahkrup bawng ban nna galaw sa mat na re lam, Nawku hpung kata magam gun kaji kaba ni tinang a magam dap hte seng ai jahpang chyarang, sumatang laika ni hpe shajin nna tang madun mat na matu"  tsun lai wa ai.

Cardinal gaw Myitkyina Sasana kaw nhtoi bat mi daram nga na rai nna, shi nga ai laman Sasana Ginwang kata na Commission wuhpung shagu hte hkrumzup ai lam ni galaw nna Saradaw Ginwang hpe tara shang lahpa galai yu reng up hkang ai lam ni galaw sa mat na re lam chye lu ga ai. 

Cardinal gaw  Apostolic Administration ngu ai Nawku Hpung a Dakkasa hku nna Sasana Ginwang hpe yu reng uphkang ai magam lit hte numbat langai lang Myitkyina sasana de sa du gawan ai lam rai nga ai.

Thomas