Cardinal Charles Bo : Wa Sarabyin Francis Thai Hte Japan Mungdan Ni De Sa Wa Na Lam Gaw Shaman Chyeju Re

Wa Sarabyin Francis A Thailand Mungdan Hte Japan Mungdan Ni De Du Gawan Sa Wa Na Lam Gaw Shaman Chyeju Re Nga Nna Cardinal Charles Bo Tsun Dat Nga Ai Shiga

Wa Sarabyin Francis a Thai Mungdan hte Japan Mungdan ni de du gawan sa wa na lam gaw shaman chyeju lu la na aten ni re nga nna, FABC Asia dan Saradaw Uhpung rapdaw Dingbaw, Myanmar Mungdan Yangon Saradaw kaba Cardinal Charles Maung Bo tsun dat nga ai.

Thailand Mungdan hte Japan Mungdan ni de Wa Sarabyin Francis du gawan sa wa na lam hte seng nna ndau shapraw ai ndau laika hta ya na zawn Cardinal Charles Bo tsun dat ai lam rai nga ai.

Cardinal Bo tsun ai hta, “Wa Sarabyin Francis gaw dai ni na prat a myi htoi langai rai nga ai, makam masham hte seng ai mungga hpe sha nrai shinggyim masha yawng hte seng ai mungga ni hpe hkaw tsun nga ai mungkan ningbaw langai nan rai nga ai, lai wa sai 2017 ning hta mung simsa ai lam hpe gun sa ya ai hkrun lam hku nna Myanmar mungdan de Wa Sarabyin Francis sa du gawan lai wa ai aten, mung chying sha ni a myit masin salum hta grai kabu gara lai wa ma ai. Ya  ndai langThai Mungdan hte Japan Mungdan ni de du gawan sa wa na lam mung anhte yawng a matu shaman chyeju lu la na aten ni rai nga ai,” nga nna Cardinal Bo tsun dat nga ai.

Makau grup yin du hkra ladaw galai shai lam hte seng nna mung Wa Sarabyin Francis kaw nna galoi mung shi a myit masin hta bang da nna shadum sharin lam galaw nga ai wa rai nga ai majaw, ndai mang hkang ni hpe hkrum kadut nga ai Thailang hte Japan Mungdan ni hta du gawan nga ai aten  ndai makau grup yin du hkra ladaw galai shai lam hte seng nna tsun shadum lam galaw na Wa Sarabyin a mungga ni hpe mung na lu na rai nga ga ai, nga nna mung Cardinal Bo tsun dat nga ai.

Wa Sarabyin Francis gaw ya ndai November shata 20 shani kaw nna 23 ya du hkra Thailand Mungdan de du gawan sa wa na rai nna, de a hpang November 23 kaw nna 26 du hkra Japan Mungdan de matut sa du gawan san a rai nga ai. Lai wa sai 1984 ning hta Wa Sarabyin Yawhan Pawlu II Thai Mungdan de du gawan lai wa yu sai hte, shaning 35 ning na ai hpang ya Wa Sarabyin Francis bai gawan du na lam rai nga ai.

 Japan Mungdan de gaw 1981 ning hta Wa Sarabyin Yawhan Pawlu II du gawan lai wa ai shaning 38 ning na ai hpang Wa Sarabyin Francis bai du gawan ai lam rai na rai nga ai.

Source: Vatican News