Cardinal Charles Bo: Shinggyim Asak Sari Manu Hte Nawku Jawng Wang Ni Hta Shanu Shingbyi Nga Ai Ni Hpe Manu Shadan Na Matu Seng Ang Ai Ni Yawng Hpe Hpyi Lajing Dat Nga Ai

Kayantharyar Jau Ginwang, Yesu A Salum Ningsang Nawku Jawng hpe Myanmar Hpyen Hpung ni kawn, lai wa sai May 23, Chyoi Pra Ai Wenyi Yu Hkrat Wa Ai Poi Laban shani, amyawk laknak kaba ni hte gap bang ya ai majaw, Kahtawlik Nawku Hpung masha marai mali (4) si mat ai hte hkala hkrum masha matsat (8) a lahta de rai mat ai majaw, ya na zawn Cardinal Charles Bo, hpyi lajing ai ndau laika “statement” hpe shapraw dat ai rai nga ai.

Hpyi Lajing ndau laika “statement” hpe May 25, bat lahkawng ya shani shapraw da ai rai nga ai. “Ya na zawn mara kata mung shawa masha ni shanu nga ai Nawku Jawng hpe jahten ya ai hpe anhte ni matsing masat masa galaw da ga ai” ngu President of the Federation of Asian Bishops’ Conferences (FABC), Asian Dan Saradaw Hpawng A Hpa-awn mung rai nga ai Cardinal a ndau laika “statement” hta tsun da nga ai.

Ndai zawn re ai gumshen ai lam ni hpe ya ya jang jahkring da ra ai, majan hpe n shabyin na matu seng ang ai wuhpung wuhpawng ni hpe akroi anoi hpyi shawn da nga ai.

Anhte Myanmar mung shawa masha ni gaw matsan ai ni rai ga ai; Covid-19 tsin-yam a majaw sak hkrung lam a matu matsan mayan rai shakut shaja taw ai mung shawa masha wan hku nga taw ma ai; mung masa lam hta zai ai ladat hte up hkang ai hpe mung hkrum sha taw nga ra ma ai, ngu mung Cardinal matut tang madun da nga ai.

Gumshen ai lam hpe amyawk laknak kaba ni gap ru bun nna myu shayi ni, sasana ma ni hte mung shawa masha ni hpe jahkrit shama ai lam gaw si hkrung si htan lam hpe shabyin nga ai ngu mung tsun shadum da nga ai.

Kam sham ai masha ni Karai Kasang hpe nawku daw jau ai san seng chyoi pra ai shara ni hpe jahten sharun ai gaw grai nan sawng ai gumshen ai lam rai nga ai; mara kata re ai ni hpe shana yuptung aten hta gasat ai gaw simlam makawp n lu ai ni hpe roi rip dang sha lam kaba nan rai nga ai; ; shinggyim myit n rawng ai ni galaw ai ladat rai nga ai; shinggyim nau na shada myit tau ya ai lam hpe tawt lai ai shut kaba rai nga ai, ngu mung tsun da nga ai.

Nawku Jawng wang hta machyu nga ai ni hta hpa laknak mung n lawm ma ai; shanhte gaw Myanmar mung shawa masha ni sha rai ma ai; Nawku Jawng kata kaw machyu nga ai gaw shanhte a kun dinghku masha ni hpe makawp maga simlam jaw na matu sha rai ma ai, ngu mung tsun dan da nga ai.

Mung shawa masha ni yawng a masin salum ni hta mara kata si mat ai ni a matu hkrap myi prwi lwi ding yang rai nga ma ai. Mung shawa masha tsa kaba si mat sai; masha hkying mun kaba matsan mayan rai yak yak hkak rai hpyen yen yen hkawm ra ma ai lam mung tsun dan da nga ai.

“Anhte ni ya na zawn hpyi lajing ai gaw mung masa ga hte tsun ai n rai ga ai; kam sham ai nawku hpung hpa-awn ni hku hpyi lajing ai she rai ga ai ngu mung sang lang da nga ai.

Myanmar mungdan simsa ai mungdan byin tai wa nna, anhte ni yawng nau na myit majing hte rau nga pra let mungdan hpe gaw gap sa wa lu na hpe mung myit mada ga ai ngu Cardinal a hpyi shawn ndau laika “Statement” jahtum hta akyu hpyi let myit mada lam hpe tsun da nga ai.

By Fr. Patrick Gawmaw Hkawng Yae

#rva.org

#rvakachinservice

https://www.rvasia.org/asian-news/cardinal-bo-expresses-anguish-over-attacks-churches-death-civilians-myanmar