Cardinal Charles Bo, Philippine Mungdan Kahtawlik Hpung Masha Ni Hpe Chyeju Dum Ga Tsun

July 21, 2021

Myanmar Mungdan kata na Kahtawlik Nawku Hpung masha ni hte rau rai nga ai hpe madun dan ai Philippine Mungdan Kahtawlik Hpung masha ni hpe Myanmar Mungdan Kahtawlik Nawku Hpung a Hpa-Awn Ningbaw, Cardinal Charles Bo chyeju dum ai lam tsun da ai hpe July 21 bat masum ya shani, Licas News Website kaw ndau da ma ai.

Philippine Mungdan Kahtawlik Nawku Hpung gaw Myanmar Mungdan na gumshen ai ni e sat kau ai hpe hkrum lai wa sai “Share Shagan Ni A Nhtoi”, July 19 ya shani, Myanmar Mung shawa masha ni hte rau rai nga ai lam lam, akyu hpyi ya nga ai lam, maibyin ai mahkrun lam hku garum ya nga na lam ni hpe tsun da ma ai rai nga ai.

Philippine Mungdan na “Episcopal Commission on Liturgy” hpung ni kaw nna lajang da ai Myanmar mungdan a matu akyu hpyi ga hte lamang ni hpe mung Philippine Mungdan Kahtawlik Saradaw Hpung Kaba kaw nna shagrin htuk shapraw ndau da ya lai wa sai rai nga ai.

Myanmar Mungdan shanglawt lu na matu woi awn lai wa ai General Awng San hte kaga marai matsat (8) gaw Myanmar mungdan shanglawt lu na shawng shaning, 1947, July 19 ya shani gumshen ai ni e sat kau ai hkrum lai wa ma ai rai nga ai. Dai nhtoi hpe “Share Shagan Ni A Nhtoi” ngu Myanmar mungdan hta masat dingsat da ai rai nga ai.

Myanmar Mungdan shanglawt lu ai nhtoi gaw 1948, January 4 ya shani rai nga ai.

Cardinal, shi a chyeju dum laika hta, Philippine Mungdan Kahtawlik Nawku Hpawng masha ni Myanmar Mungdan a matu akyu hpyi nhtoi hpe masat akyu hpyi ya ai gaw, anhte Myanmar Mung shawa masha ni a myit masin hta kabu myit dik hkam sha lam kaba hpe jaw ya nga ai, ngu tsun da nga ai.

Ndai shamu shanawt akyu hpyi ya ai lam gaw anhte Myanmar Mung shawa masha ni hpe shalan shabran, shamai shatsai ya nga dingyang rai na hpe mung myit mada ai, ngu Philippine Mungdan Saradaw Hpawng Kaba a “president” lit hkam Saradaw kaba, Romulo Valles kaw shagun ai laika hta Cardinal matut tsun da nga ai.

“Ndai masa hku nna anhte hte rau nga nga ai gaw ndai kaw na Nawku Hpung hpe n-gun atsam ban ya ai rai nga ai; Karai Kasang gaw shawang tsawra myit kaba hte daw jau ai ni hte Philippine na Nawku Hpung masha ni hpe shaman ya u ga,” ngu mung n-gun awai la let chyeju dum, akyu hpyi shaman da nga ai.

RVA Shiga Shapoi Dap kaw nna mung Myanmar Mungdan na Kahtawlik Nawku Hpung masha ni hte rau kaga Hkristan Nawku Hpung ni mung Philippine na Kahtawlik Nawku Hpung masha ni shanhte hte rau rai nga ai hpe hkam sha lu ai majaw chyeju dum ai lam ndau da ma ai lam chye lu ai.

Lai wa sai May 30 ya shani hta mung mung masa lam hte seng nna, gumshen ai ni e rim la, hkyuk htawng sharawng, zingri zingrat ai hpe hkrum ai majaw yak hkak jam jau hkrum nga ai Myanmar mung shawa masha ni a matu hte Myanmar Mungdan simsa lam a matu Philippine Mungdan ting hta Misa Hkungga nawng jau, akyu hpyi ya lai wa masai rai nga ai.

Licas News Shiga Dap kaw nna ndau da ma ai.

By Fr. Patrick Gawnaw Hkawng Yae

#licasnews

#rvakachinservice

https://philippines.licas.news/2021/07/21/cardinal-bo-of-myanmar-thanks-filipino-faithful-for-solidarity/?utm_source=LiCAS.news+Philippines+Subscribers&utm_campaign=7c5308114f-LiCAS.news+Philippines+Newsletter&utm_medium=email&utm_term=0_f833f7af41-7c5308114f-355310360

July 21, 2021