Cardinal Bo: Wa Sarabyin a sharin shaga laika “Encyclical letter” “Fratelli tutti” gaw Asia dan a matu grai ahkrak ai hku shadum ya ai

Asia Dan, mungdan shagu na Saradaw hpawng daju “the Federation of Asian Bishop’s Conference (FABC) a ningbaw president Cardinal Charles Maung Bo gaw Wa Sarabyin a encyclical “Fratelli tutti” gaw Asia dan hte matut taw nga ai, seng taw nga ai ngu tsun da ai.

Covid -19 chya bra ana tsin-yam hkrum sha nga ai Asia dan hta shada matsan dum garum ai lam, myit hkrum galung kahkyin gumding lam, hte tara rap ra lam ni hpe Wa Sarabyin a “Fratelli tutti” sharin shaga ai hte maren hkrang shapraw sa wa ra ga ai, nga nna Cardinal sumru woi da nga ai.

“Wa Sarabyin Francis a saw shaga ai hte maren nanhte a prat hta, wuhpung wuhpawng hta, galung kahkhing gumding lam, shada garum shingtau pawn ba la hkat ai lam hte chyeju dum chyeju htang ai lam a-nga nga u ga. Shinggyim masha hkum shagu hpe manu shadan, hkap la chye na ya let hkung ga lara di hkat na hpe Wa Sarabyin Francis saw shaga da ai re,” ngu Cardinal matut shadum da ai.

Cardinal Charles Bo, the president of the FABC, gaw ndai lam hte seng nna, Asia dan, mungdan shagu na Saradaw ni hpang de shagun laika ka shagun da ai.

Anhte Asia dan kaw nga ai ni kaja wa sha ahkyak la nna Wa Sarabyin a mungga “Fratelli tutti” hpe shachyam shabra ga. Ndai zawn shachyam shabra ai gaw anhte a lahpa galai na ban prat masha ni hpe lam hpaw ya ai tai na re,” ngu October 12 ya shani na Cardinal Charles Bo a shagun laika hta rawng nga ai.

Asia dan mungdan law law na Asuya ni gaw sut masa lam hte shinggyim bawng ring lam hta woi awn shakut nga ma ai rai tim, hkrat sum nga ma ai. Dai majaw mung masa lam hta woi awn nga ai ni gaw yawng a matu hte n-gawn tawa hte seng ai (Universal good) mai kaja lam a matu myit ga; mung masa lam gaw mung masha akyu a matu re; mung masa lam gaw shinggyim arawng sari manu hpe mu tam chye lu ra ai; mung masa galaw ai num la yawng gaw mung masa lam hpe tsawra ai ni rai ra ai; mung masa lam gaw sut masa lam hte shinggyim bawng ring lam, bai myusha lam yan hte htung hking lam yan ni hpe pawm hpawn nna woi awn chye ra ai lam Cadinal matut shadum da ai.

Covid 19 a majaw 2020 shaning gaw mung shawa masha ni hta kashuk kashak, n-hti n-htang byin mat ai lam ni, hkrit tsang ra ai lam ni hte hkrat sum mat ai lam ni law law hkrum sha ra nga ai. Wa Sarabyin Francis gaw dai lam ni a majaw anhte a sasana magam hkum jahkring da ga; matut shakut let nawku hpung hpe sak hkrung shangun ga; dai gaw galoi mung mau hpa rai nga na re ngu n-gun jaw shadum da ai hpe mung Cardinal bai tsun dan da ai.

Wa Sarabyin Francis gaw anhte hpe nau na tsawra myit kumhpa jaw da ai rai nga ai ngu nna mung tsun dan da ai. Nau na majing shada tsawra lam madun ai, yu lakawn ai, hkung ga lara di ai lam ni gaw simsa lam a n-pawt n-hpang rai nga ai. Nau na majing shada myit hkrum kahkying gumding lam a matu hkrum shaga jahta bawng ban ai gaw nga nan nga ra ai masa rai nga ai. Nau na majing shada re ngu myit la ai lam n nga ai rai yang shanng lawt ai ahkyaw ahkang hte rap ra lam galoi mung nga na n  re ngu mung tsun shadum da ai.

Grau nna, chyam bra ana Covid 19 tsin-yam hkrum ten hta makam masham hpung shada da nau na majing myit hte shada hku hkau nga ra ai lam Samaritan masha a ga shadawn hte anhte hpe shadum da ai lam Vatican shiga dap hte RVA shiga dap kaw nna ndau da ma ai hpe RVA Jinghpaw Nsen Shapoi Dap kaw nna ndau dat ga ai.

Translated by Fr. Patrick Gawmaw Hkawng Yae

#vaticannews

#rvaenglishnews

#rvakachinservice

https://www.vaticannews.va/en/church/news/2020-10/bo-fabc-letter-asian-bishops-fratelli-tutti.html