Brother Paul Zinghtung Htoi Naw a Deacon Shatai Poi Galaw

29 June 2019, Myitkyina

Kachyi Htu Jau ginwang, Layen Mare kaw na Brother Paul Zinghtung Htoi Naw a Deacon shatai poi hpe lai wa sai June shata 29 ya, laban bat kru ya shani , Myitkyina San Columban Cathedral Nawku Jawng kaba hta galaw la lu sai rai nga ai.
Deacon shatai poi hta Myitkyina Sasana Sagurem wa Wa Saradaw Francis Daw Tang , Kachyi Htu Ginwang up Wajau John Nhpawt Seng Lat hte nta masha ni, Jinghku jingyu ni, Sasana Ginwang kata na Jau Ma Tara Hkaw Sara ni, Edin San Luka Chyum Jawng ma ni hte hpung masha ni law law sa du shawng lawm ma ai.

Poi lamang hte maren, dai shani na Missa hkungga hta Brother Paul Zinghtung Htoi Naw gaw,Wa Saradaw Francis Daw Tang a lata kaw nna Deacon aya hpe hkam la sai rai nga ai.

Deacon Htoi Naw hku nna shi a hkam sha lam hpe “Jahpawt kaw na lamu marang n htuk ai ai majaw hpung masha jinghku jingyu ni n sa du lawm lu na hpe grai tsang ai, raitim yawng sa du nna ngwi pyaw awngdang ai hte Deacon aya hpe hkam la lu sai majaw grai kabu ai, grau nna gaw , Ya gaw Jau tai na matu, Jau ni na uhpung uhpawng de shang wa sai re majaw, Karai Kasang a magam bungle hpe san seng san pra ai hte gun hpai na matu ninggam langai re sai ‘ nga nna tsun lai wa ai.

Missa ngut ai hte Wa Saradaw shana ai hta, Deacon Paul Zinghtung Htoi Naw a htani htana Jau aya hkam la ai Jau Tai poi hpe dai ning laman,Kachyi htu Jau Ginwang kata kaw nangbat langai lang hku nna galaw na matu Ginwang up Jau hte hpung masha ni tang shawn da ai lam nga ai, dai hte maren, dai ginra de mung masa htuk ai rai jang, galaw byin na re, n dai masing lam byin wa nna htap htuk simsa ai hku galaw lu na matu akyu hpyi garum na matu tsun lai wa sai.