Brother Ephrem Kum Be A Brother Prat (25) Gumhpraw Jubali Poi Galaw

Myitkyina Jau Ginwang, Nam Koi Mare, Naga Kawng kaw Naga amyu sha ni hpe woi awn yu nga ai Brother Ephrem Kum Be a Brother prat (25) ninghpring Jubali hpe 2021 May shata 22 (bat 6 ya) shani Naga Kawng na John Paul Nawku Jawng wang kaw galaw lai wa sai lam chye lu ai.

Brother Ephrem Kum Be gaw Naga amyu sha langai rai nna, Nan Yun Ginwang, Ga Loon Mare kaw na rai nna 1995 ning hta Saint Francis Xavier brother langai tai wa nna 2020 ning hta rai yang Brother tai ai prat 25 ning hpring du sai raitim masa lam amyu myu a majaw dai ning she Jubali masat galaw byin ai re lam chye lu ai.

Brother a Jubali hpe Myitkyina Saradaw Ginwang kata na Naga amyu  hpung masha ni woi awn let Myitkyina Jau Ginwang na hpung masha ni hte rau galaw ai rai nna Wa Jau ni, Mama ni hte Myitkyina na Brother ni shang lawm lai wa ma ai lam chye lu ai.

Naga Kawng kaw Naga Amyu sha ni 2009 ning kawn nga lai wa ai rai nna  lam amyu myu a majaw myitkyina de nnan du wa ai shaloi nga shara htinghput htingra nlu ai hte nkau ni masha nta kaw machyu nga ai, nkau ni sun galaw let nga ai ni rai nna dai zawn dumbru dum bra byin taw nga ai hpe Naga Htunghking hpung kawn woi awn let shara jahkrat Mare de ya ai kaw nna ya ten hta Jinghpaw, Lisu hte kaga Myen amyu sha ni law law nga wa ai rai nna Kahtawlik Hpung masha htinggaw 13 rai wa sai lam Brother tsun ai hte maren chye lu ai.

Brother Ephrem gaw Brother langai hku nna Myitkyina Sasana hta shara law law kaw magam gun lai wa sai rai nga ai. Naga Htunghking hpung kaw mung shanglawm nna amyu sha lam yan ni hta mung ta tut woi zawn zinlum let sasana magam lit hpe gun hpai nga ai Brother langai rai nga ai.

Fr. Patrick / Edited by Thomas