Bawm Kapaw Adawt Kasat Ai Lam Hte Seng Nna Sawk Sagawn Ai Lam Galaw Ya Na Matu Sri Langka Mungdan Hkristian Nawku Hpung Ni Tsun Lajin

Bawm kapaw adawt kasat lam ni byin wa na shiga hpe Asuya kaw nna tau nau lu la ai lam nga lai wa ai raitim,  shingdang lam n galaw ya lu lai wa ai majaw,  April shata 21, Paska Poi shani Sri Lanka Mungdan na Nawku Jawng ni hta bawm kapaw adawt kasat hkrum lai wa ai hte masha law law si hkala hkrum lai wa masai rai nga ai. Si hkrum lai wa sai masha ni a hkum tsawp moi mang ni hpe April 23 ya shani kaw nna makoi mayang lam ni galaw hpang nga sai hte Kahtawlik hpaji sharin jawng ni hpe mung April shata 29 ya shani du hkra naw pat da na re, nga ai.

Masha marai 300 jan si hkrum lai wa sai ndai mabyin a majaw hkrit kajawng myit kahtet nga ai mungchying sha ni hpe mung, azim sha myit shazim la ga, kasu kabrawng lam ni n galaw ga, nga nna Kahtawlik Saradaw ni kaw nna tsun shadut ai lam ni mung galaw da nga ma ai. April 23 ya shani hpe mung, Mungdan a yawn hkyen nhtoi ngu nna masat galaw let, jahpawt daw hta minute 3 azim sha nga nna asak si hkrum lai wa sai ni hpe hkungga lam galaw lai wa ma ai.

Lai wa sai bat lahkawng, April 23 ya shani du hkra lu la ai jahpan hta, asak si hkrum lai wa sai ni yawng marai 321 rai sai hte, hkala hkrum ai ni mung marai 500 jan re, nga ai.

Bawm kapaw adawt kasat ai lam hpe sawk sagawn ai lam hkyak hkyak galaw ya na hte, mungchying sha ni kasu kabrawng n byin hkra hting hkang ai lam ni hpe Mungdan asuya kaw nna galaw na hpe myit mada ai, nga nna Sri Lanka Mungdan Saradaw uhpung rapdaw kaw nna tsun dat nga ai.

“Grai ahkyak ai makam masham poi hpe galaw let, Nawku akyu hpyi ai lam ni galaw nga ai, Nawku jawng ni hpe ya na zawn bawm kapaw adawt kasat lam galaw ai gaw, kaja wa nan grai mazut dik ai, nhkru dik ai magam bungli re, shinggyim masha ni hpe hkye la lu na matu mara kata nni nkri lam ni law law hpe hkam la sai Madu Yesu a kasi hpe yu la hkan sa nna, masha jet ai masa, tara rap ra ai lam ni hpe, tsawra matsan dum lama ai myit, akyu hpyi ai myit ni hte mahtai tam la lu hkra galaw ra na ga ai,” nga nna asak si hkrum lai wa sai masha nkau mi hpe makoi mayang lam galaw ngut nna bai wa ai Saradaw Winston Fernando tsun dat nga ai. Ndai Saradaw gaw bawm kapawt hkrum lai wa ai nawku jawng nga ai shara kaw nna Saradaw rai nga ai.

Saradaw matut tsun ai hta, “Hpung masha ni hku nna, grai myit machyi hkam sha nga ma ai raitim, azim sha nga nna hkam sharang lam galaw na matu Saradaw ni tsun n gun jaw ai lam hpe hkap madat nga ma ai. Nkau mi nga yang, anhte mung dai shani hta rau si lawm mat ga ai rai yang grau pyi pyaw na ga ai, nga nna tsun ai ni pyi lawm ma ai,” nga nna Saradaw Fernanndo tsun dat nga ai.

Adawt kasat lam ni byin wa mai ai shiga hpe tau nau lu da nga ninglen shingdang lam n galaw lu lai wa ai majaw Asuya ningbaw ni a galaw ai ladat hpe n gun nlu ai lam, Mungdan hta kaja wa ra nga ai gaw ningbaw ningla kaja re, lu la ai shiga hta hkan nna ra ai shimlam magam bungli ni hpe asuya kaw nna galaw ai lam nga lai wa ai rai yang ya na zawn hkrum na n rai nga ai, nga nna mung Sri Langka Mungdan Kahtawlik Saradw uhpung rapdaw a ningbaw Saradaw kaw nna tsun dat ai lam Vatican shiga dap kaw nna shana dat nga ai.    

Source: Vatican News