Bangladesh Mungdan Na Refugee Camp Shara Ni Hta Covid -19 Ana Kap Chyam Bra Wa Na Hkrit Tsang Ra

Bangladesh Mungdan Kata Rohingya Ni Shanu Nga Ai Refugee Camp Shara Ni Hta Covid -19 Ana Kap Chyam Bra Wa Na Hkrit Tsang Ra Ai Caritas (Karuna) Bangladesh Kawn Shadi Jaw Da Ai  Shiga

30 June 2020

Covid 19 Chyambra ana hpe makaw maga ai lam kaba langai gaw, masha shada tsan gang madang hta nga ra ai lam rai nga ai. Raitim, camp ni hta dai madang hku masat ya jang nga shara lajang na mayak ni law law nga taw ai lam chye lu ai.

 Banglasdesh mungdan kata na Refugee Camp ni gaw san seng lam n nga ai hte nga shara ni gyip ai hte Chyam bra ana Covid 19 tsin-yam du shang nga sai majaw hkrit tsang hpa kaba rai nga ai lam Kahtawlik nawku hpung a gawng malai shinggyim bungring lam hta lit la galaw nga ai Caritas (Karuna) kawn sadi jaw da ma ai.

“Masat da ai gawk kaji kaw masha 10 hte lahta de nga ra ma ai. Shanhte nga ai nta ni mung plastic muka kalup, plastic shakup ni hte gap da ai rai nga ai. shadu sha shara ni hte hka shing shara, maza sa shara ni yawng jawm lang ai rai nga ai. Dai majaw chyambra ana Covid—19 kap hpang nga sai hte hkrit tsang hpa kaba rai nga ai,” nga nna Cox’s Bazar kaw dung ai Caritas Banglasdesh hte seng ai shinggyim matut mahkai dap rung magam gun (communication officer), Immanuel Chayan Biswas kawn tsun shadum da ai.

Dai refugee camp kaw nga ai ni gaw Myanmar mungdan na mung masa lam a majaw hprawng htawt nga ra ai ni rai ma ai. Banglashdesh kaw dai zawn htawt nga ra ai ten kaw na kan hkyen ana hte kaga ana zingli amyu myu hkrum sha lai wa ma ai hte Banglasdesh mungdan kaw bying lai wa ai shingra tara hpyen rai nga ai (cyclones) nbung laru hte (monsoons) muktung nbung tsin-yam hkrum sha ai mung hkring hkring rai ma ai. Ya mung Mungkan ting chyambra nga ai Covid -19 ana tsin-yam hpe hkam sha ra nga ma ai lam mung matut tsun dan da ai.

Banglashdesh refugee camp ni hta nga ai masha jahpan gaw sen 11 daram rai ma ai. Shanhte gaw Myanmar mungdan kaw na 2017 shaning hta hprawng du wa ai ni rai ma ai. Mung chying masha masat ai hta mang hkang nga wa ai majaw hte makam hpung n gun kaba grau dik ai ni a garan ginhka ai lam ni nga wa ai majaw Muslim myusha Rohingya ni 1982 shaning kawn Banglashdesh mungdan de hprawng htawt shingbying nga ra ma ai re lam mung tsun da nga ai.

May 14 ya shani Rohingya camp nga masha langai myi hpe coronavirus ana kap masha mu hpang wa ai. Ya du hkra nga yang ana kap masha marai 46 hpe jep mu da sai rai nna, marai 5 gaw dai ana a majaw si mat sai. Ana jep sagawn ai lam mung masat shadang hpring tup nlu galaw shi ai lam mung chye lu ai. Refugee camp ni hte jasan jaseng lam hte hkam ja lam hpe hkrat tup galaw ya na lu na matu gaw mayak  kaba langai mi rai nga ai.

 Gawng kya ai lam law law nga nga ai ndai camp ni hta aten tup yu reng hparan nga ra na re lam Banglasdesh Caritas kawn sha na da ai hpe Vatican kawn ndau da ya nga ai hpe RVA jinghpaw nseng shapoi dap kawn shalai ndau ya dat ga ai.

Translated By Fr. Patrick Hkawng Yae