Australia Mungdan Hta Shingra Tsinyam Hpe Jawm Manga Ai Magam Galaw Na Wuhpung Langai Hpaw Dat Ai Shiga

Australia mungdan nawku hpung kaw nna shingra tara tsinyam lam ni hpe jawm manga ai magam lam ni hta rau mahkri shawn magam bungli jawm galaw na wuhpung langai hpe hpaw ning htan dat nga ai shiga

Australia mungdan hta sharaw wan hkru hkat ai mang hkang hte matut manoi rai nna tsinyam lam ni law law byin hkrum nga ai masa a majaw, Australia mungdan Kahtawlik nawku hpung kaw nna shingra tara tsinyam lam ni hpe jawm manga ai magam lam ni hta rau mahkri shawn magam bungli jawm galaw na wuhpung langai hpe hpaw ning htan dat nga ai.

Ya hpaw ning htan dat ai wuhpung hpe “Catholic Emergency Relief Australia” CERA ngu nna shamying da nga ai the, Australia mungdan ting na Kahtawlik garum ningtum wuhpung wuhpawng ni yawng jawm mahkri shawn let, mungdan shadang nna byin hkrum nga ai shingra tara hte seng nna yak hkak mang hkang tsinyam lam ni hpe jawm yan hparan garum lam ni galaw na matu re, nga ai.

Australia Kahtawlik saradaw rap daw, Australia Religious uhpung, Catholic Social Services Australia, bai Australia Kahtawlik hpaji dap Commission ni jawm jahkrum nna ndai wuhpung hpe hpaw ninghtan dat ai lam mung rai nga ai.

“Shata ru nna Australia mungdan hta byin lai wa ai sharaw wan hkrum hkat ai mang hkang lam ni byin pru ai hpang ya na zawn ndai wuhpung hpe hpaw ning htan dat ai lam rai nga ai, htawm de byin pru wa mai ai shingra tara the seng ai mungdan kata na yak hkak tsinyam lam ni hpe mung jawm mahkri shawn yan hparan lam ni galaw na matu mung rai nga ai,” nga nna Australia mungdan Saradaw ni a rap daw kaw nna tsun dat nga ai.

Ya hpaw ning htan dat sai “Catholic Emergency Relief Australia” CERA wuhpung kaw nna, sharaw wan hkru hkat ai lam a majaw tsin yam hkrum nga ai mung chying sha ni, shanhte a prat bai gaw gap la ai hkrun lam galu hta garum shing tau madi shadaw la ai lam ni galaw ya na, bai,dum nta masha nkau wan hta lawm mat ai, dum nta sutgan arung arai ni sum shamat kau ai lam ni a majaw garen gari hkrum nga ai ni hpe myit masin wenyi lam ni hte seng nna aten galu shalan ya, bai gaw gap ya ai lam ni galaw ya na matu re, nga ai.

2019 ning September shata kaw nna hkru hkat hpang wa ai sharaw wan a majaw Australia mungdan hta lamu ga hectares wan 10 jan hkru hkat mat ai. Dai wan hta masha marai 29 nlaw htum si hkrum mat sai hte, hti ndang ai nam na du sat du myeng ni law law mung si hkrum mat masai rai nga ai. Lai wa sai bat ni hta marang htu ya lai wa ai a majaw sharaw wan ni zim mat wa sai rai tim, kahtet shadang bai raw tsaw wa na masa nga nga ai majaw wan hkru hkat ai lam ni bai matut byin wa na hpe Australia mungdan mung chying sha ni naw myit tsang nga ma ai, nga nna Vatican shiga dap kaw nna shana dat nga ai.

Source;Vatican news