Australia Mungdan Hta Saradaw Kaba Langai Hpe Shut Shai Ai Hku Tara Jeyang Daw Dan Hkrum Lai Wa Sai

Saradaw kaba (Cardinal George Pell) gaw asak naw kaji ai ma ni hpe shut shai ai lam hte mara hta hkrum let, htawng kru ning jahkrat da hkrum lai wa sai hta na, laning mi rawng lai wa sai re.

Raitim, Australia Mungdan a tsaw htum ai tara rung (High court) kaw na tara agyi marai sanit gaw myit hkrum myit ra let, Saradaw kaba hpe hkum tsup lam n nga ai sakse ni hte rau mara hta hkrum ai re lam dawdan lai wa sai.

Australia Mungdan a tsaw dik ai tara rung kaw nna sakse sakgan ni yawng hpe yu maram dawdan mat wa ai ten hta, Saradaw kaba hpe mara lu ai ngu shadu let, mara tam nga ai masha ni hpe myit dik shangun lu na matu, Saradaw kaba hpe mara jahkrat dat ai lam sha re hpe mu lu sai re. Dai re majaw, Saradaw kaba hpe mara nlu ai lam bai dawdan shapraw dat ya lai wa sai.

Saradaw kaba Cardinal Pell  June 29, 2017 ya hta tsun ai, Ngai gaw mara kata mara tam hkrum ai wa re. shanhte shut ai lam she re. Hkum sai shan roi rip ai ngu myit jasat gaw ngai a matu matsat shabat nan re.

Tara rung kaw nna tara nnan bai dawdan shana ngut ai kade nna ai hpang, Wa Sarabyin gaw missa hkungga hta Wa Saradaw kaba hpe mara tam ai ni yawng a matu kyu hpyi ya lai wa ai.

Wa Sarabyin Francis tsun ai hta ….

“Ndai wan gam ladaw ten ni hta, Madu Yesu a nni nhkri roi rip hkrum ai hpe anhte mu lu nga ai. Tara sara kaba ni gaw Yesu hpe kade ram n gaw n wai ai myit nnga hkra mara tam ninghkap ai hpe mung anhte mu lu nga ai. Yesu gaw mara kata, mara nnga ai sha, matsan dum myit nnga ai nju ndawng myit ni a majaw Yesu gaw tara jeyang hkrum sai. Dai re majaw daini gaw, tsawra myit nnga ai sha nju ndawng myit ni a majaw, n tara ai hku je yang hkrum, dawdan hkrum nga ai masha ni yawg a matu kyu hpyi ya mayu nngai.

Tara rung kaw nna hpang jahtum ngang kang ai tara hpe dawdan dat ya sai hte Saradaw kaba mung kalang bai lawt kawt wa sai re. Raitim, tara dawdan shut nna, Saradaw kaba hpe shi a machyi hkrum ai shabrai shi bai lu la na, nlu la na gaw kadai mung nchye ai.

Australia Saradaw kaba ni gaw, hkum shan roi rip ai hte seng nna, tara pinra rung a dawdan ai lam gaw galai shai na nre nga, tsun lai wa sai. Saradaw kaba ni tsun ai hta, kadai wa rai rai, hpung masha langai ngai kaw nna, tinang hpe hkum shan roi rip ai hte seng nna, mara jaw wa jang, tinang nan balik (Police) ni kaw sa yang gau kaja na re nga tsun lai wa sai lam Vatican shiga dap kaw nna shana dat nga ai.

Vatican Shiga

Date, April 7, 2020

Translator, Henry Nhkum Brang Dee