Asak ( 87 ) Ning Aji Dingla A Kyu Hpyi Yaw Shada Lam

Asak ( 87 ) ning rai sai, Aji Laju Gum An gaw lai wa sai shaning na Wudang shagrau poi shani hta Alam Wudang Bum de sa nna kashu kasha ni a matu akyu hpyi ya ai lam tsun dan ai.

Aji Dwi dingla a kyu hpyi yaw shada lam ni 

Ngai hkrai hkam kaja nga yang byin na I, n byin ai. Kashu kasha ni yawng galaw lu, galaw sha ai, machye machyang hpring ai, grau nna pyaw ai hku nna myit hkrum myitra nna rawt jat galu kaba wa na.

Shu ni sha ni grau nna Karai Kasang a tengman ai lam hta hkan nang hkan sa, shada garum shingtau nna, ngang kang ai chyeju hpe hkam la lu u ga.

Ru yak nni nkri hkrum nga ai kaw na mung lawt lu u ga, n hkru n kaja wa ai ni a myit masin hpe mung Karai Kasang jahtoi ya nna kaja wa mu ga, grau nna Karai Kasang shaman ya mi ga ngu shakut ai re. 

Alam Wudang Bum poi hpe  shaning shagu September shata ( 14 ) ya shani ang ai Udang shagrau poi hta galaw ai rai nna, daining gaw ( 39 ) lang ngu na poi rai nga ai. Wudang shagrau poi hpe lai wa sai aten ni hta nhtoi masum ya tup Bum lagaw hte bum ntsa ni hta lani mi Missa hkungga masum lang nawng nna hpung masha ni law law sa du  shang lawm nna galaw ai raitim Covid ana zinli hte Mung masa n pyaw ai lam ni a majaw lai wa sai ( 2 ) ning nlu galaw kau ai. Daining mung Mung masa nsim sa ai re majaw September shata ( 14 ) ya shani sha galaw na rai nga ai. Ndai Wudang bum poi hta e  myu hpung n ginhka ai sha masha law law sa du lawm ai hpe mu mada lu ai. Saradaw ginwang a Wudang Bum poi re ai hte maren lai wa sai aten ni hta Jinghpaw Mung hta nga ai shara shagu na nawku hpung masha ni law law wa sa du shang lawm a rai nga ai.

Alam Wudang Bum gaw,  Alam Bum jau ginwang na Nhkai Bum hta  gawgap da ai Myitkyina Saradaw ginwang ting a akyu hpyi shara Wudang Bum rai nga ai.

By - Julia Ja Ing