Anhte Masin Salum Ni Hpaw Da Na Hpe Karai Kasang Ra Sharawng Nga Ai Lam

Myit ja ai lam hpe tsi shamai ya lu ai tsi gaw matsing sum hting da lu ai lam re, Matsan dum lama ai lam ni hte hpring tup nga ai anhte a masin salum ni hpaw da na hpe Karai Kasang ra sharawng nga ai, nga nna Wa Sarabyin Francis tsun dat nga ai. Feb 18 bat lahkawng ya jahpawt na Missa hkungga hta dai shani a Kabu gara ai shiga hte la kap nna ya na zawn Wa Sarabyin tsun dat ai lam rai nga ai. Dai shani na Kabu gara ai shiga gaw, Marku a Kabu gara ai shiga hta na, Madu Yesu hte rau hkawm sa nga ai li ntsa hta, muk nla gun ai hpe dum nna Kasa ni myit ru lam tsun jahta nga ma ai, ja chyum mungga rai nga ai.

Wa Sarabyin tsun ai hta, “myit ja ai myit ngu ai gaw sape ni hta byin nga ai myit masin salum, matsan dum lama chye ai masin salum gaw Madu Yesu a salum rai nga ai. Hparishe ni, Saduces ni gaw Karai Kasang ra sharawng ai lam hpe nrai shanhte a myit hpe machyu mayu ai ni rai nga ma ai, shanhte hta matsan dum lama ai myit ngu ai nrawng ma ai majaw myit masin ja ai masha ni rai ma ai. Raitim mung ja ai myit masin salum hpe tsin shamai kau na tsin nga nga ai, dai gaw matsing sumhting da lu ai lam re, hkye hkrang la ai shaman chyeju atsam kaba nga nga ai ngu ai lam hpe myit dum nga ra ai. Anhte a myit masin ni ja nga ga ai rai yang hkye hkrang la ai shaman chyeju nga ai nga ai lam hpe ndum nmai rai mat wa chye ga ai. Ndai myit ja ai myit, masin salum ja ai lam kaw nna ga li ga law lam ni, gasat gala majan shabyin ai lam ni, myit hting kup ai lam ni, jahten sharun lam ni galaw ai de anhte yawng mat wa chye ga ai, hpa majaw nga yang ndai myit ja ai masin salum rawhng ai masha ni hta matsan dum lama ai lam ngu ai nrawng nga ai.

Hkyik hkam dik ai kabu mai dik ai hkye hkrang la ai mungga gaw Karai Kasang anhte hpe tsawra matsan dum nga ai ngu ai mungga rai nga ai. Tsinyam hkrum nga ai masha langai ngai hpe mu mada shagu Madu Yesu hta tsawra matsan dum lama ai myit ni rawng nga ai ngu ai lam hpe Kabu gara ai shiga ja chyum mungga shara law law hta mu lu nga ga ai. Matsan dum lama ai lam ni hte hpring tup nga ai anhte a masin salum ni hpaw da na hpe Karai Kasang ra sharawng nga ai” nga nna Wa Sarabyin hkaw tsun lai wa ai lam Vatican shiga dap kaw nna shana dat nga ai.   

Source;Vatican News