Anhte A Lamu Ga Nta Hpe Makawp Maga Na Jawm Pawng Let Ta Tut Hkrang Shapraw Na Ra Kadawn Nga Ai Lam (Earth Day )Mungkan Lamu Ga Ninghtoi Shani Wa Sarabyin Tsun Dat Nga

(50) lang ngu na (earth day) lamu ga nhtoi hpe bat 2 ya shani hta galaw ai rai nna, Wa Sarabyin gaw “mungdan shagu chyam bra nga ai yawn hkyen lam jaw ai coronavirus ana zingli hpe ning hkap gasat na matu dum hprang ai myit hkrum rap ra lam madun let anhte a kaang yak hkak jam jau dik ai ni hpe pawn ba garum la ai ladat nga jang she awng dang lu na re” ngu tsun da nga ai.

Wa Sarabyin a 2015 shaning na enclyclical, “Laudato Si” laika hta hpan da hkrum ai mungkan hpe yu reng na matu ngu ai gaw lamu ga a apu asi ni hpe anhte sak hkrung lam a matu hkam la lu ga ai re. Ning pawt Ning hpang laika hta anhte hpe shadum da sai hte maren, anhte gaw ndai lamu ga na sha nre; karai kasang kaw na asak hte mung seng nga ga ai. Dai majaw Wa Sarabyin gaw, “anhte ni ndai yawng hte seng ai mungkan dum nta kaw shinggyim kun dinghku masha ni zawn hpan da hkrum sai nga yawng nga pra hte nbung ai myu hpan ni hku arau sha nga pra nga ga ai” nga tsun da nga ai.

Anhte a tingkyeng myit majaw lamu ga hpe sin makawp maga hpareng hpajang na matu anhte hkum nan hkrat sum nga ai re. Lamu ga hpe anhte hkum nan awu asin galaw ai; ntsawm hkra galaw ai; dai zawn galaw ai a marang e anhte a sak hkung lam hpe anhte hkum nan dingbai dingna jaw ai lam re. Dai majaw Wa Sarabyin gaw mungdan shada, buga kata lamu ga hpe makawp maga ai lam hpe myit bang let ta tut shakut shaja nga ai ni hpe arawng la madi shadaw n gun jaw nga ai re. Shi tsun ai hta, anhte a kashu kasha ni lam ntsa hkawm sa let anhte hpe sharin ya nga ai gaw “lama na anhte ni hkam jan nga pra lu hkra madi shadaw ya nga ai makau grup yin shing ra maka hpe jahten ai rai jang anhte ni a matu shawng lam ngu nga na nre” ngu ai ma ni tsun chye ai ga rai nga ai.

Anhte a lamu ga nta hpe yu reng na matu koi yen ai rai yang, anhte ni lamu ga ntsa mara shut na; htingbu ni hpe mara shut na; grau nna Hpan Madu a ntsa mara kaba na re.” nga nna Wa Sarabyin anhte hpe shadum da nga ai. Dai majaw anhte gaw yawng hte seng ai dum nta ngu ai anhte a lamu ga hpe hkau chyap ai hte tsawm htap ai hku zing hkang sung lang nga lu na matu shakut ra ga ai.

Lamu ga hpe tinang akyu matu sai chyup kaboi sha hkrum na dum zawn nmai nawn nmai hkam la ai. Kam sham ai ni a matu nga yawng nga pra gaw hpan da magam kaw na apu asi re. Hpan da magam gaw anhte kam sham ai Hpan Madu a atsam re. Shi atsam shaw hpan da ai gaw shi manu shadan ai lam re. Shi manu shadan ai hpe anhte shinggyim masha ni hpe ap ya sai re. Ap ya hkrum sai anhte shinggyim masha ni mung ap da ya ai Hpan Madu hkum nan manu shadan ai zawn manu shadan ra ga ai re.

Dai majaw lamu ga hpe akyu jashawn nga ai ni yawng hpe lamu ga gaw anhte yawng hte seng ai dum nta hta n ga, Karai Kasang a nta re,anhte ni chyoi pra ai lamu ga ntsa kaw tsap nga ga ai re” ngu Wa Sarabyin Francis (50) lang ngu na (Earth Day) lamu ga n htoi hta shi a mungga hte anhte hpang hpe shadum jahprang ya nga ai shi ga hpe vatican shiga dap kawn ndau shapoi da nga ai.