American Hte Maxico Mungdan Jarit Hta Hka Yawng Si Mat Ai Hkan Wa A Mabyin A Majaw Wa Sarabyin Ja Ja Myit Yawn Lawm Nga

26 June 2019, Maxico

Bu htawt hkawm masha rai nga ai Kawa hte kasha num sha asak 2 ning daram re ai shan wa, hka lim si mat wa ai mabyin shiga a majaw Wa Sarabyin Francis ja ja myit yawn lai wai ai.

Lai wa sai laban shani American Mungdan de lai shang wa lu hkra hka hpun yawt nna lai rap shakut nga yang, Asak 25 ning re ai Oscar Alberto Martinez Ramirez ngu ai kawa hte, asak 2 ning daram sha naw re ai shi a kasha num sha Valeria ngu ai hkan wa Rio Grande ngu ai hka nu hta hka lim si mat ai rai nga ai.

Bu htawt hkawm masha ni hpe tsawra myit hte garum la na matu dingrun tsun shadut lam galaw nga ai Wa Sarabyin kaw nna, ya na zawn American Mungdan de lai rap shang wa lu hkra shakut ai hkan wa, American hte Maxico Mungdan jarit na Rio Grande ngu ai hka shi hta lim si mat ai sumla hpe mu nna na chying myit npyaw lai wa ai, shan wa a matu Wa Sarabyin akyu hpyi ya lai wa ai, bai majan the kaga tsin yam lam ni kaw nna lawt lu hkra shim ai mungdan ni de hprawng pru wa ai hkrun lam ni hta asak si hkrum mat wa sai bu htawt hkawm masha ni yawng a matu mung wa Sarabyin akyu hpyi ya lai wa ai, nga nna Vatican shiga dap lit hkam Alessandro Gisotti, shiga dap de tsun shana dat nga ai.

Hka hpun la bai kanawng nna sa da ai, Kasha hpe palawng hte ba da ai hkan wa ai moi mang hpe Maxico Mungdan maga hka gin gau hta lai wa sai bat langai ya shani mu lai wa ma ai rai nga ai.

Madu jan hpe Maxico hkran de tawn da nna kasha hpe shawng American hkran de sa da ai, ma hpe gin gau hta tawn da nna madu jan hpe bai wa tau la na matu hka bai nhtang hpun yawn wa nga yang, kasha hka de hkan shang wa ai majaw kasha hpe woi la dat ai hpang hka hpun la ja ai majaw hka wa lahkawng yan yawng lawm si mat wa ai re, nga nna Vatican shiga dap kaw nna shana dat nga ai.

 Source: Vatican News