American Hpungtang Hpaji Ninghkring Lahkawng Hpe Nobel Kumhpa Shagrau Ai Shiga

2021 shaning a shawng ningnan shagrau hkrum ai Nobel kumhpa madu yan gaw American na Hpungtang Hpaji Ninghkring lahkawng, David Julius hte Arden Pataputian yan rai ma ai. Shinggyim hkumhkrang hpe jum hkra ai hte rau hkumhkrang hta rawng ai kahtet madang hpe chye lu ai hpaji hpe tam sawk sagawn shapraw la lu ai yan rai nga ai. Ndai hpaji hpe tam sawk sagawn shapraw lu ai majaw shan lahkawng hpe Nobel kumhpa shagrau ai re lam chye lu ai.

Ndai zawn sawk sagawn htuk shapraw lu ai gaw anhte a hkum kahtet ai ana kaw na htuk ang ai tsi hte lawan dik tsi shamai la lu na myit mada shara kaba rai nga ai.

Ndai American Hpungtang Hpaji Ninghkring yan gaw shan lahkawng ningtawng ai mahkrun lam hku mungkan masha akyu ara a matu kaba dik ai kumhpa hpe htuk shapraw lu ma ai majaw ndai kumhpa gaw shan a matu gingdan nga ai, ngu Nobel Committee a secretary-general, Thomas Perlman tsun shana da ai.

2021 shaning a Noble kumhpa shagrau ai hta shinggyim hkumhkrang Tsi hte seng nna akyu kaba galaw ai ni hpe mung jaw na matu Karolinska Institutet kaw hpawng de ai Nobel kumhpa shagrau hpung ni myit hkrum daw dan da ai hte maren, ndai yan hkum hkrang kahtep madang hpe jum hkra ai hte chye lu ai ladat hpaji hpe sawk sagawn da lu ai majaw shan hpe jaw ai re lam, Tomas Perlman matut tsun da ai.

Shan lahkawng a sawk sagawn ai hpungtang hpaji gaw hkumhkrang hta byin nga ai lam hpe sawk sagawn ai hpe madung da ai rai ma ai rai nna, hkumhkrang hta na myi, na, hpyi, ni hpe yu maram madat hkam sha yu ai hte masam maram lu ai hpaji re ai lam chye lu ai.

Ndai zawn sawk sagawn da lu ai a akyu ara gaw ningnan re ai tsi gawn lajang ai ladat hpe akyu jashawn lu wa na re ngu kung kyang ninghkring ni masam maram da ma ai.
Nobel kumhpa hkap la ai Perlmann gaw, Nobel kumhpa shagrau ai a marang e masha langai a hpaji, shing n rai, akyu galaw ai lam hpe hpaw malang ya ai, shinggyim sak hkrung lam hpe yawng a matu hpaw malang ya ai ahkyak kaba tam sagawn shachyan ya ai mung rai nga ai, ngu tsun da nga ai.

David Julius gaw 1955 shaning hta New York kaw shangai chyinghkai wa ai rai nna California hte San Francisco na Dakkasu jawng ni hta hpaji hka ja lai wa yu sai wa re lam chye lu ai.

Arden Patapoutian gaw 1967 shaning Lebanon na Beirut hta shangai chyinghkai wa nna, shi a ramma prat hta USA na Los Angeles de htawt sit nga lai wa ai re lam chye lu ai. Shi gaw La Jolla, California ni hta laika hpaji ni sawk sagawn ai rai nna ya mung matut manoi naw sawk sagawn nga ai re lam chye lu ai.

Nobel kumhpa shagrau ai hta ja dazik kumhpa hte rau dollar wan 1.14 (10 million Swedish kronor) rai nga ai. Nobel kumhpa shagrau na matu gaw de hpang da ai wa gaw 1895 shaning hta n nga mat ai Swedish myusha Afred Nobel ngu ai wa rai nga ai.

Ndai kumhpa gaw daining a matu masat langai ngu na lang kumhpa shagrau ai rai nga ai. Physics, chemistry, literature, peace, hte economics hpaji ni hta ningtawng ai ni hte seng nna shagrau na Nobel kumhpa mung naw nga ai lam chye lu ai.

 

By Fr. Patrick Gawmaw Hkawng Yae

#vaticannews

#rvakachinservice

https://www.vaticannews.va/en/world/news/2021-10/american-scientists-awarded-nobel-prize-for-heat-and-touch-disco.html

 

Add new comment

7 + 11 =