American Gumsan Magam Hpe Rev.Dr.Hkalam Samson Kawn Myen Mung Na Hkristan Ni A Masa Lam Tang Shawn Lai Wa

Shiga Ka Ai - Thomas

Mungdan 17 kaw na Makam Masham hte seng nna zingri hkrum ai kawn lawt pru wa ai masha marai 27 hpe American Gumsan Magam Donald Trump Jr. kawn White House kaw na The Oval Office ngu ai Gumsan magam a rung gawk kaw 2019 July 17 Bat masum ya shani hkrum zup shaga lai wa ai lam chye lu ai.

Dai zawn hkrum zup ai hta Myanmar Mungdan kaw na marai mali lawm nna Asuya hpyen dap kawn makam masham lata let rim hkrum nna zingri zingrat, , n tara ai hku htawng jahkrat ai lam ni hpe Gumsan Magam Trump hpe tang madun ai lam galaw lai wa ma ai.

Jinghpaw Wunpawng Hkalup Hpung Ningbaw rai nga ai,  Sara Kaba Dr. Hkalam Samson kawn mung, Myanmar Mungdan na hkristan ni a masa lam hpe tang madun mat wa sai lam chye lu ai.Sara Kaba Dr.Hkalam Sam Sun tsun ai hta,

“Ngai gaw Myanmar Mungdan dingdung daw, Jinghpaw Wunpawng Hkalup Hpung a ningbaw rai nngai, Myanmar Mungdan hta anhte hkristan ni hpe Myen Hpyen Dap kawn zingri ai lam grai nga ai.Makam masham hpe wanglu wanglang Nawku dawjau na ahkang mung nau n lu ga ai.Dai hta n-ga, Amyu sha laknak lang hpyen hpung ni kawn Mungdan asuya hpyen dap hpe ninghkap gasat taw nga ra ai, dai majaw American Asuya kawn Myanmar Mungdan kata na amyu sha mayen ni hpe madung da nna Amyu bawsang ningbaw ningla ni hpe Democracy, Madu up hkang aya Federalism awng dang lu na matu garum madi shadaw ya na grai ahkyak la ai, mani kaw na masat dat ai  Myen Hpyen Dap ningbaw ni hpe pat shingdang ahkyak la ya ai majaw mung grai chye ju kaba sai “ nga nna American gumsan magam hpe tangshawn lai wa sai lam VOA shiga dap Internet laika man kaw ka da ai hte maren chye lu ai.

Sara Kaba Dr.Hkalam Sam Son hte rau American Gumsan magam hpe hkrum ai hta Myen hpyen dap kawn rim nna htawng jahkrat zingri hkrum lai wa sai Mungu Mare Hkalup Hpung na Hpungtau Langjaw Gam Seng mung lawm ai lam chye lu ai.Bai nna Yakhai Mungdaw kaw Myen hpyen dap kawn shara jasan jaseng gasat yan ai lam galaw ai kaw na lawt pru wa nna Bangladesh hpyen koi yen camp kaw nga ai, Yakhai mung Rohingya Bangali uhpung a ningbaw Mohip Ullah hte Women’s Peace Arakan hte Justice for Women uhpung hpe gaw de woi ai May Way Way Nu ni mung lawm nna Rohingya Bangali ni shan hte a nga shara de lawan bai wa nga lu na matu  American Asuya kawn gara hku garum ya lu na ngu ai lam ni hpe tang madun san ai lam galaw lai wa sai lam chye lu ai.

Ndai zawn hkrum shaga ai lam hpe American Sumtsan hkringmang Rung kawn woi awn let Mungdan ga daga hkringmang madang hku Washington DC kaw July 16 kawn 18  ya shani du hkra galaw na rai nga ai Makam Masham lam hta Wanglu Wanglang rai Nawku dau jau lu na ahkaw ahkang rawt jat wa lu na lam hte seng ai zuphpawng a daw chyen lamang hku nna galaw ai re lam chye lu ai.

American Gumsan Magam Trump kawn “ Mung masha ni tinang Mungdan kata hta makam masham wanglu wanglang rai Nawku daw jau na ahkaw ahkang n lu ai rai yang, ngam nga ai kaga ahkaw ahkang ni mung  sum na lam nga ai, shanglawt ai ngu mung lachyum n nnga sai.Dai majaw America Mungdan gaw Makam Masham wanglu wanglang rai Nawku dawjau lu na matu shakut  mat wa na re, dai ni sa du ai ni hpe mung grai chye ju dum ai, mayak maahkak lam ni law law hpe lai di lu ai ni re majaw grai shakawn mayu nngai, arawng mung la ai.Ngai hku nna galoi mung nan hte hte rau tsap ya na re” nga nna tsun lai wa sai rai nga ai.

Myanmar, Miwa, Dingdung Korean, Vietnam,SiriLlanka, Pakistan, Afghanistan,Iran,Iraq, Sudan, Yimen, Turkey n dai zawn re ai Mungdan 27 kaw na Makam masham a majaw zingri hkrum ai kawn lawt wa ai masha 27 hpe American Gumsan Magam Donal Trump laksan shaga nna ga san , san htai ai lam ni hpe mung galaw lai wa ai re lam chye lu ai.

Hkrumzup hpawng hta, Gumsan Magam Trump hte rau, Ningtau gumsan magam Mike Pence hte Amu madu Mike Pompeo ni mung lawm ai lam chye lu ga ai.

Souce : VOA Burmese, Reuters