Amazon Ginra Makawp Maga Lam Hte Seng Nna Galaw Na Saradaw Ni A Laksan Synod Hkumra Hpawng Kaba Hta Bawng Ban Sa Wa Na Lam Ni

Dingda America dan, Amazon ngu ai tsit lali ai ginra hpe matut makawp maga na lam hte seng nna galaw na lajang nga ai Saradaw ni a laksan Synod hkumra hpawng kaba hta bawng ban sa wa na lam ni hpe, lai wa sai bat langai ya shani Vatican kaw nna ndau shapraw dat nga ai. Ndai Saradaw ni a hkumra hpawng kaba hpe ya du wa na October shata praw 6 ya kaw nna 27 ya shani du hkra Vatican hta galaw na lajang nga ai rai nga ai.

Vatican kaw nna ndau shapraw dat ai, ndau laika a shawng na daw hta, Amazon ginra kaw na jahtau madai nga ai nsen ni hpe madi madun da nga ai. Dingda America dan hta nga nga ai, Mungkan hta kaba pa dik htum rai nga ai Amazon ginra hten za wa nga ai lam, dai buga ginra na Amyu bawsang masha ni a lam, Amazon ginra maling kaba ni a lapran lwi nga ai hka shi hka nu ni a ahkyak ai lam ni, ndai hka shi hka nu ni gaw hpun kawa, nampu nampan, du sat du myeng ni a matu chyu sha nrai, dai buga ginra hta sak hkrung nga pra nga ai buga nga bawsang masha ni a htunghkying maka kumla, makam masham, sak hkrung nga pra lam a matu ahkyak ai asak hka shi hka nu ni nan rai nga ai lam ni hpe madi madun da nga ai.

Lahkawng ngu na daw hta gaw, Amazon ginra na maling kaba ni hten za wa nga ai lam, maling hpe shamyet shanat nna pra nga ai sak hkrung baw hpan dusat dumyeng law law ni hkoi mat wa nga ai lam, maling ni hten za mat wa nga ai majaw buga nga bawsang masha ni matsan jam jau hkrum sha nga ai mabyin lam ni hpe ka shaleng madun da nga ai.

Amazon ginra ngu ai gaw dingda American dan na grup yin miles wan 8 daram dam lada ai ginra pa kaba rai nga ai, Brazil, Bolivia, Peru, Ecuador, Colombia, Venezuela, Guyana, Suriname hte French Guyana Mungdan ni yawng lawm ai ginra kaba rai nga ai. Grup yin Kilimiter wan 5 jan gaw tsit lali tsawm ai maling kaba rai nga ai. Ndai maling kaba gaw Mungkan hta kaba dik htum ai hpun maling mung rai nga ai zawn, mungkan ga matu ahkyak ai nbung Oxigin, san tsawm ai hka ni jaw ya nga ai maling kaba rai nga ai. Mungkan ga a sak hkrung baw hpan law law shanu pra nga ai ginra mung rai nga ai majaw, mungkan ga a matu hpa hte mung galai kau nmai ai manu dan ai Mungkan sut gan nan rai nga ai, nga nna Vatican shiga dap kaw ka da nga ma ai.

Source:Vatican News