Alam Bum Jau Ginwang Up Ningnan Galai Lit Shatsam Ai Lam Galaw

Ginwang up jau ningnan hpe jau ginwang a jahpan ap ya ai masat sumla

 

Alam Bum jau ginwang hta ginwang up jau lit magam hpe galai gun hpai na rai nga ai Wa Jau Luka Kawa Tu Mai hpe ginwang up jau lit magam ap ya ai lamang hpe ( May 21, 2022 ) ya shani  Alam Mare na St. Mary nawku jawng kaw galaw la lu sai.

Dai shani na lamang hta  Alam Bum Jau Ginwang hta ( 2 ) ning magam gun lai wa sai Wa Jau Paul Kinsa Tu Awng hte ningtau jau magam gun hpai lai wa sai, Wa Jau Peter Bunghku Lawt Naw yan hpe mung jau ginwang hpung masha ni kaw nna chyeju  dum shakram ai lam galaw ai.

Ginwang up jau ningnan rai nga ai Wa Jau Luka Kawa Tu Mai kaw nna shi hpe kabu gara hkalum la ai majaw chyeju dum ai hte  shi gaw ndai buga ginsa masa ni hpe atsawm garai n chye ai re majaw, nawku hpung magam gun ni hte nawku hpung masha ni yawng ta gindun garum shingtau la na lam tsun ai. Bai nna Alam Bum Jau Ginwang hta magam gun lai wa sai ginwang up jau ni hku nna lai wa sai aten hta Wudang shagrau poi hpe grai hkik hkam awng dang ai hku law law galaw lai wa sai raitim, Covid ana zinli hte mung masa n sim sa ai majaw nlu galaw mat ai. Daining gaw Wudang shagrau poi lu galaw na hpe myit mada ai lam mung tsun ai.

Missa hkungga ngut ai hpang Alam Bum jau ginwang ramma ni a jau ningnan hkalum poi hte htawt sit magam gun na ginwang up jau hpe chyeju dum shakram ai masat dingsat gawdin ginsup shingjawng poi hpe mung matut manoi galaw mat wa ai.

Alam Bum jau ginwang hta magam gun lai wa sai Wa Jau Paul Kinsa Tu Awng gaw Myitkyina Karuna bawng ring dap rung kaw htawt sit magam gun hpai taw sai rai nga ai hte ningtau jau lit magam gun hpai lai wa sai Wa Jau Peter Bunghku Lawt Naw gaw Myitkyina Saradaw ginwang a Ramma lit hkam jau hte PLN jau ginwang a ningtau jau lit magam hpe gun hpai sa wa na rai nga ai.

Alam Wudang Bum jau ginwang gaw Myitkyina Saradaw Ginwang hte Jinghpaw Mung a matu  laksan akyu hpyi shara masat da ai  Wudang Bum  nga ai shara rai nga ai.

 

Shiga - Julia Ja Ing 

Add new comment

10 + 2 =