Afghanistan Hpyen-yen Ni Hpe Hkap Hkalum, Makawp Maga, Garum La Na Matu Wa Sarabyin Hpyi Shawn Ai

Wa Sarabyin: Afghanistan Hpyen-yen Ni Hpe Hkap Hkalum, Makawp Maga, Garum Shingtau La Ya Na Matu Hpyi Shawn

 Wa Sarabyin Francis gaw, September 5, laban shani, San Peter pa hta, “Madu A Lamu Kasa Akyu Hpyi” ten, Afghanistan mungdan kata majan tsin-yam a majaw tinang mungdan kata de hprawng yen shang wa ai ni hpe mungkan mungdan shara shagu na mung shawa masha ni hkap tau, hkap hkalum, makawp maga, garum shingtau ya ga ngu hpyi shawn da nga ai hpe Vatican Shiga Dap kaw nna ndau da ma ai.

  Ndai zawn hkap tau, hkap hkalum, makawp maga, garum shingtau ya ai ai a marang e, Afghanistan mung masha ni, grau nna sak naw ram ai ni a shawng lam myit mada shara hte shanhte a shinggyim sari manu hpe manu shadan ya ai tai nga ai.

  Shanhte a matu shara lajang ya ga, nga shara jaw ga; ndai zawn rai nna mungdan kata majan a majaw hpyen yen yen hkawm nga ra ai ni gaw shimlam nga ai shanu shabyin shara hkan tam nga ma ai; hprawng yen shang wa ai ni hpe tinang a mungdan hta hkap hkalum, makawp maga, garum shingtau la ya ga, ngu Wa Sarabyin Francis hpyi shawn da ai.

  Madu A Lamu Kasa Akyu Hpyi ten hta Wa Sarabyin Francis shanhte hte rau hpyen yen tsin-yam hkrum nga ai ni yawng a matu mung akyu hpyi ya nga ai: “Ngai akyu hpyi ya nngai, shanhte hkam sharang lu ai atsam n nga ai kaw nna lawt lu mu ga, mungdan law law shanhte hpe hkap la mu ga, makawp maga ya mu ga, garum shingtau ya mu ga, prat ningnan hpe tam la lu mu ga, gaw gap sa wa lu mu ga, ngai akyu hpyi ya nngai,” nga nna mung akyu hpyi da ya nga ai. Sanhte hpe garum ya nga sai ni hpe mung Karai Kasang shaman ya u ga hte matut nna garum shingtau makawp maga ya lu mu ga, bai nna, dai zawn garum shingtau makawp maga ai hta ra ahkyak ai lam ni hpe garum ya ai hpe mung hkam la lu mu ga, ngu matut akyu hpyi da ya nga ai.

  Wa Sarabyin Francis gaw, Afghanistan mungdan, kabul mare daju hpe Taliban hpyen hpung ni August 15 ya shani zing hkang la ai hpang nan, Afghanistan mung shawa masha a mabyin masa lam hte seng nna ahkyak la garum ya nga sai rai nga ai.

  Mungkan masha yawng akyu hpyi ya nga na matu hte mai byin ai maga hku garum shingtau ya na matu mung garum hpyi da ya nga ai. Dai hpyen laknak ni hte gasat ai ladat n re ai man hkrum hkrum shaga bawngban ai ladat hku mahtai tam sa wa lu mu ga, simsa lam a Madu Karai Kasang kaw akyu jawm hpyi nga ga, ngu mung saw shaga da ai.

  Myu shayi ni a ahkaw ahkang hte simlam a matu mung Wa Sarabyin Francis hpyi shawn da ya ai. Taliban ni Kabul hpe zing la ai hpang, dai mungdan na myu shayi ni mung shawa n-gun madun ai hta madung shang lawm ma ai rai nna, law law rim hkrum, zingri hkrum nga ma ai lam chye lu ai. Taliban ni hpe ninghkap ai Afghanistan mung masha seng lahkawng (200,000) daram gaw bum mayan nam maling hkan makoi yen hkawm nga ra ai lam mung chye lu ai.

  UN Amu Madu, Secretary-General Antonio Guterres mung, shinggyim nau na shada hku hkau kanawn mazum lam hpe jahten sharun ai shoi hpa, tsin-yam, tsin-dam ni hpe koi yen lu na matu UN kawn shakut hparan nga ai lam, UN zuphpawng kaba hpe Geneva kaw September 13 ya shani galaw na re lam, US Secretary, Antony Blinken mung Qatar kaw sa du na aten masat da sai raitim, Taliban hpyen hpung ni hte hkrum lu na myit mada shara n lu shi ai lam, Pakistan Kaichyen matut mahkai hpung hte ISI ningbaw Kaba General Faiz Hameed gaw Kabul kaw du nga sai raitim, Shiga la ai ni san ai hpe gaw hpa mahtai mung n jaw da shi ai lam, tsun da nga ai.

Vatican Shiga Dap kaw nna ndau da ma ai.

Source; Vatican News

By Fr. Patrick Gawmaw Hkawng Yae

#vaticannews

#rvakachinservice