(60) Lang Na Rawt Malan Ninghtoi Wunli Sharawt Akyu Hpyi Hpawng Galaw

Daini Wunpawng Amyu Sha Mung Bawng Rap Daw (WMR) kawn woi awn nna Wunpawng myusha ni roirip dip sha hkrum ai kaw na lawt lu lam a matu Laknak lang rawt malan wa ai (60) lang na Rawt Malan Ninghtoi Wunli Sharawt akyu hpyi hpawng lamang hpe Myitkyina,Jaw Bum,Nawng Nang hta galaw la lu sai.

Lamang hta Myusha Dawng Hkawn hkungga jaw ai,Karai Mungga Htawn Tsun ai,Akyu hpyi shaman ai hte Wunpawng shingni hpung ni kaw nna shangwi shapyaw ai lam ni hpe galaw  lai wa sai.

Ndai lamang hta Makam masham nawku hpung shagu de na hpung woi kanu kawa ni,Myitkyina hte ni nawn ai hkan na mung chying shawa masha ni yawng marai ( 5000 ) daram sa du shang lawm ai hpe mu chye lu ai.