(4) Lang Ngu Na Myitkyina Saradaw Ginwang Ramma Ni A Hkrum Zup Hpawng Kaba ( Youth Congress ) Galaw Na

( 4 ) lang ngu na Myitkyina Saradaw Ginwang Ramma ni a hkrum zup hpawng (Youth Congress)  hpe 2020 April  shata 25 ya kaw nna May 1 ya shani du hkra,Edin San Luka Chyum Jawng wang hta  galaw sa mat na rai nga ai.

Youth congress galaw na matu zuphpawng ni galaw hpang taw sai ra nna, January shata 23 ya shani mung Ramma lit hkam Wa jau Saw Di Di Pho Khwar hte ginjaw ramma magam gun ni woi awn nna,Wa saradaw Francis Daw Tang  hte Wa Jau  ni,jau ginwang shagu na ramma dat kasa ni,saw shaga da ai nawku hpung magam dap shagu na dat kasa ni,nawku hpung kanu kawa ni shang lawm let masum lang ngu na zup hpawng hpe galaw mat wa sai rai nga ai.

Dai zup hpawng hta sa du shang lawm ai ni kaw nna shada da hapji jaw bawng ban jahkrum ai lam,ramma hpawng a matu committee hpaw ninghtan ai lam ni galaw la lu sai.

Dai zuphpawng hta sa du lawm ai  Wa Saradaw Francis Daw Tang a mungga hta -- woi awn chye ai ningbaw ningla ni byin tai wa lu na matu gaw ramma aten kaw nna shaman shakyang ya ai lam law law galaw ya ra ai,kanu kawa ni hku nna mung ramma ni hpe n gun jaw ra ai,madi shadaw garum ya ra ai lam hte nawku hpung magam bungli hta sha nrai,asuya magam bungli hte myusha lam yan,wuhpawng wuhpawng shagu  ni hta mung magam bungli shang galaw ra ai lam ni n gun jaw mungga tsun lai wa sai.

Myitkyina Saradaw ginwawng  mungbaw hpung Ningbaw Sut Du Labya Mung Htoi kaw nna mung  Ramma ngu ai gaw shawng lam a ningbaw ningla ni re,Catholic ramma ni wuhpung wuhpang shagu,magam dap shagu hkan magam gun ai masha grai nlaw ai hpe mu mada lu ai gaw myit npyaw hpa naw re,dai majaw ya na zawn youth congress galaw ya ai gaw ningbaw ningla tai ai ramma ni law wa na matu mung rai nga ai lam n gun jaw ga tsun lai wa sai.

Myitkyina ginwang up Wa Jau Dr.Peter Hka Awng Tu kaw nna mung  ndai youth congress galaw ai gaw myitkyina sasana ting a matu ahkyak kaba re ai zawn ramma ni a matu lam shagu hta rawt jat wa lu na lam rai nga ai hte nawku hpung galu kaba lam a matu mung  rai nga ai  majaw Wa Saradaw hte wa jau ni, nawku hpung hta magam gun nga ai ni yawng ndai youth congress hta shang lawm na matu grai hkyak nga ai.

Ramma ni gaw anhte kanu kawa ni a madi shadaw ai hta hkan nna shamu shamawt taw ai ni rai nga ma ai.Dai majaw ramma ni hpe garum madi shadaw ya ai,shapan shalat ai hta jau ginwang shagu na ginwang up wa jau ni hte tara hkaw sara/num ni,nawku hpung kanu kawa ni yawng mung n gun dat ,shang lawm madi shadaw garum ya na grai ahkyak ai lam n gun jaw ga tsun lai wa sai.

Hpang jahtum ginjaw ramma lit hkam Wa Jau Saw Di Di Pho Khwar kaw nna saw shaga da ai hte maren sa du bawng ban lawm,hpaji jaw ya sai Wa Saradaw hte wajau ni,nawku hpung a myitsu kanu kawa ni yawng hpe grai chyeju dum ai lam,nanhte kanu kawa ni sa du hpaji jaw la ai majaw daini na zup hpawng grai awng dang ai hte galaw la lu sai lam chyeju dum mungga tsun lai wa sai.

Ndai zawn Saradaw Ginwang ting na Ramma ni a sharin hpawng hte hkrumzup hpawng hpe mali ning hta kalang galaw ai rai nna, lai wa sai  (2016 ) ning hta galaw ai ( 3 ) lang ngu na Ramma hpawng hpe mung Myitkyina, Edin San Luka Chyum Jawng Wang hta sha galaw mat wa sai rai nga ai.