( 39 ) Lang Na Alam Wudang Poi Hta Masha

Myitkyina Saradaw ginwang hta galaw ai ( 39 ) lang na Alam kyu hpyi bum Wudang shagrau poi hpe ( 14 September 2022 ) ya shani galaw lai wa sai rai nga ai.

 Myitkyin Saradaw ginwang ting hte seng ai akyu hpyi shara, Wudang bum hku nna masat da ai, Alam mare na Alam Wudang bum poi hpe galaw mat ai daining gaw ( 39 ) lang na Wudang bum poi rai nga ai. Shaning shagu September ( 14 ) Wudang shagrau poi shani hpe madung sha ang nna galaw taw ai raitim, lai wa sai ( 2 ) ning gaw Covid ana zinli hte mung masa n pyaw ai lam ni a majaw nlu galaw mat ai. 

Daining ( 39 ) lang ngu na Wudang shagrau poi hta gaw akyu sa lawm ai masha bum lagaw kaw ( 7000 ) jan, bum ntsa de ( 5000 ) jan yawng rai yang mun mi jan sa du akyu hpyi hkam la ai lam Poi shabyin shatai Komita tsun ai kaw na chye lu ai. Daining na lak lai ai lam gaw anhte a Myanmar Mungdan lawan ngwi pyaw simsa wa lu na matu hte tinang a shut kau sai mara ni hpe mara dan hkam ai hku nna, pyaw hpa hte ai lam n galaw ai, malu masha daw sha ai lam n nga ai hte malu masha hte kaga arung arai ni dut ai gat seng ni yawng pat hkum da ai hpe mu lu ai. 

Wudang shagrau poi Missa hkungga hpe bum lagaw kaw masum lang, bum ntsa de lahkawng lang galaw ai. Lai wa sai ten ni hta Missa hkungga hpe bum lagaw hte bum ntsa aten langai mi hta sha lani mi masum lang galaw lai wa sai raitim dai ning gaw mung masa lam a majaw shana yup nna Missa hkungga galaw ai hpe mung jahkring tawn da ai rai nga ai.

Wudang shagrau poi hta yaw shada lam amyu myu tawn da let Kahtawlik hpung masha malawng maga hte kaga hpunau hpung masha ni mung law law wa sa du akyu hpyi hkam la ai hpe mu lu ai. Wudang bum lung ai masha ni hpe maram yu dat yang asak kaji kaba hkum hkrang lawm nga ai. Dai ning bum ntsa de lung ai ma kaji ni hta asak ( 3 - 5 ) ning lapran na ma kaji ni lawm ai zawn sasana ma hpung, Holy Childhood ma ni law law lawm ai. Bum lung ai masha ni hta law malawng gaw ramma ni rai nna, asak ram sai myitsu salang, salang jan ni mung law nga ma ai. 

Alam Wudang Bum gaw tsaw de pre ( 2850 ) tsaw ai rai nna, Alam mare na deng 2 jan tsan ai shara re. Alam Wudang Bum hpe ( 1983 ) ning hta Wa Jau Paul Lasang La dai aten na Tanghpre ginwang up jau kaw nna Yesu Hkristu a Wudang hte masha hpe hkye na matu ngu ai yaw shada lam hte gaw gap hpang ai re lam chye lu ai.

Wa jau Paul Lasang La gaw  asak ( 84 ) ning jau prat ( 53  ) ning aten  ( 27 November  2021 ) ya shani Madu Yesu hta yup pyaw mat wa sai re.  Wa Jau Paul Lasang La gaw Alam Wudang Bum hte Mali Zup na Simsa Lam A Nu Maria lung hpe mung gaw gap da ya sai Wa jau rai ai.

Shiga - Julia Ja Ing 

 

 

Add new comment

12 + 7 =