2023 Shaning Hta Galaw Na “Mungkan Ramma Nhtoi” Hta Ramma Ni Shang Lawm Ga, Ngu US Saradaw Ni Saw Shaga Da Ma Ai

(38) lang ngu na Mungkan Ramma Nhtoi hpe Portugal, Lisbon hta 2023 shaning hta galaw na rai nga ai hte maren, dai World Youth Day (WYD) kaw ramma ni shang lawm ga, ngu US Saradaw ni saw shaga da ma ai.

Ndai lang na World Youth Day hpe 2023 ning August shata praw 1-6 laman galaw sa wa na re lam, Lisbon na Cardinal Patriarch Manuel Clemente kawn October 4 ya shani tara shang ndau dat sai hpang, ya na zawn US Saradaw ni kawn mung dai Mungkan Ramma Nhtoi lamang hta shang lawm na matu ramma ni hpe saw shaga da ma ai rai nga ai. Ndai Mungkan Ramma Nhtoi hpang jahtum shani hta Wa Sarabyin Francis kawn tara shang ginchyum dat na, sa wa lu na hpe mung myit mada ai lam Cardinal Clemente tsun da ai.

 

Lai wa sai bat hta ndau shabra da ai ndau laika statement hta Saradaw kaba Salvatore J. Cordileone, chairman of the U.S. Conference of Catholic Bishops’ (USCCB) Committee on Laity, Marriage, Family Life and Youth, hte  Saradaw Edward J. Burns, the USCCB’s episcopal liaison to World Youth Day, yan gaw ramma ni hte seng nna ndai zawn shiga hpe na lu ai majaw mung, US kaw na ramma ni mung dai lamang hta shang lawm garum shingtau sa wa na shiga hpe na lu ai majaw mung Saradaw ni yawng kabu pyaw nga ga ai ngu tsun da ma ai.

 

1985 shaning hta Wa Sarabyin Yawhan Pawlu II gaw World Youth Day hpe galaw na matu matsun ai, dai gaw asak 16-35 ning lapran na ramma kaji kaba yawng, mungkan madang rau galaw na matu yaw shada nna masing jahkrat hpang ai rai nga ai. Shawng na lang galaw ai Mungkan Ramma Nhtoi hpe 1986 ning hta  Roma kaw galaw ai rai nga ai.

 

World Youth day hpe galaw ngut nna du na World Youth Day bai du ai shaning lapran ni hta gaw Saradaw Ginwang madang hku nna Ramma nhtoi lamang hpe galaw na matu matsun da ai rai nga ai.

2019 shaning, Panama hta galaw ai gaw hpang jahtum galaw ai World Youth Day rai nga ai. Dai shaning na Mungkan Ramma Nhtoi hta anhte Jinghpaw W.P jau ni hte rau Ramma law law sa du shang lawm la lu sai rai nga ai.

(38) lang ngu na Mungkan Ramma Nhtoi a lashum ga manoi gaw Luka 1:39 hta na “Maria gaw alawan rawt sa wa ai,” ngu ai rai nga ai.

 

Nu Maria hpe lamu kasa Gabriel ga sa shana ai shaloi, Shi a kana Elizabeth mung na-um na-sin rai nga ai lam tsun dan ai hte rau, alawan rawt sa ai lam rai nga ai.

US Saradaw ni kawn ndai Mungkan Ramma nhtoi hte seng ai lamang ni hpe ndai link https://www.usccb.org/topics/world-youth-day hta tau nau lamang ni hpe aten dep ndau ya nga na re lam chye lu ai.

 

Daining na Saradaw Ginwang madang galaw ai Mungkan Ramma Nhtoi hpe shawoi galaw nga ai kungla shaman poi laban shani a malai, Hkristu Hkawhkam Poi Laban shani hta galaw sa wa na re lam chye lu ai.

 

Lai wa sai September 27 ya shani, Wa Sarabyin Francis, Kasa 26:16 hta na “Jan rai rawt tsap u, nang dai ni nang ngai hpe mu mada lu sai lam hte, hpang de ngai nang hpe naw madun dan na ra de ai lam ni hpe masha kaga ni e sakse hkam dan na rai ndai,” ngu ai gabaw hte mungga htawn da ai.

Mungkan Ramma Nhtoi hpe Mungkan madang galaw ai gaw masum ning rai yang kalang galaw ai rai nga ai.

 

By Fr. Patrick Gawmaw Hkawng Yae

 

https://www.vaticannews.va/en/church/news/2021-10/usa-bishops-invite-youth-to-join-wyd-2023.html

Add new comment

14 + 5 =