2022 Shaning A Matu Wa Sarabyin Masat Da Ai Akyu Hpyi Yaw Shada Lam

Wa Sarabyin: 2022 Shaning A Matu Wa Sarabyin Masat Da Ai Akyu Hpyi Yaw Shada Lam

2021, February 6, bat kru ya shani 2022 shaning a matu Wa Sarabyin Francis masat da ya ai shata shagu na akyu hpyi yaw shada lam ni hpe Vatican kaw nna ndau da ma ai.

JANUARY – (for true human Fraternity)

Shinggyim nau na myit majing nga wa na matu yaw shada nna akyu hpyi ga! Makam masha karan ginhka ai lam n nga u ga! Makam masham a majaw karan ginhka, zingri zingrat hkrum sha nna yak hkak jam jau hkrum nga ai ni yawng shanhte a shinggyim ahkaw ahkang hte shang lawt ai makam hta nawku daw jau sa wa lu na matu akyu hpyi na rai nga ai.

FEBRUARY – (For religious sisters and consecrated women)

Sasana Ma Ma Hpung Ni Hte Sak Prat Ap Nawng Daw Jau Nga Ai Myu Shayi Sha Ni A Matu Akyu Hpy Ga! Labau hta Shanhte a sasana magam hpe gwi gwi atsam dat lai wa ma ai zawn anhte ni a aten hta mung matut manoi atsam dat sasana galaw lu mu ga matu akyu hpyi na rai ga ai.

MARCH – (For a Christian response to bioethical Challenges)

Hkum hkrang hte seng ai mayak mang hkang (challenges) ni hpe hparan sa wa lu na matu akyu hpyi ga! Shinggyim ahkaw ahkang hte seng ai lam hpe hkra machyi shangun ai ladat ni jai lang wa ma ai majaw ya na zawn yaw shada let akyu hpyi na matu n gun jaw da ai rai nga ai.

APRIL – (For health care workers)

Hkamja lam a matu ap awng bungli galaw nga ai ni a matu akyu hpyi ga. Yi sun hkauna, jak rung ni hta bungli galaw sha ai ni a matu akyu hpyi ga! Grau nna machyi makaw hkrum nga tim, Asak kung n jing n ngut sai rai tim, bungli galaw shangun hkrum ai ni a matu akyu hpyi ya ra ga ai. Bai matsan ai mungdan ni hta matsan mayan rai bungli galaw sha ra ai ni hpe mungdan Asuya ni hte mungdan kata na wuhpung wuhpawng ni e lam woi garum shingtau ya u ga matu akyu hpyi ya na rai ga ai.

MAY – (For faith-filled young people)

Ramma ni makam masha ngang kang wa mu ga matu akyu hpyi ga! Nu Maria zaw madat mara ai hte makam masham hpe sung sung sumru la lu mu ga, makam hpe atsam marai dat let hka ja la lu nna daw jau magam ni hta mung myit lawm hkum lawm shang lawm wa mu ga matu akyu hpyi na rai ga ai.

JUNE – (For Families)

Kun dinghku shagu a matu akyu hpyi ga! Masat shadang n nga ai tsawra myit hte shanhte a tsawra myit hpe shangang shakang sa wa let wenyi lam hta san seng san pra grau ai hte sak hkrung nga lu mu ga matu akyu hpyi na rai nga ai.

JULY – (For the Elderly)

Asak kaba kaji kawoi ni a matu akyu hpyi ga! Shanhte a mahkrum madup hte hpaji byen-ya gaw masha ni hpe lam woi ya let shawng lam myit mada lam jaw ya lu mu ga matu akyu hpyi ga!

AUGUST – (For small businesses)

Magam bungli kasha ni sha galaw sha nga ai ni a matu akyu hpyi ga! Sut masa lam hte shinggyim bawng ring lam hta kaji kadun ai majaw magam bungli kasha ni hpe sha galaw sha nga ra ai ni hpe lam tam ya lu mu ga hte dai zawn re ai wuhpung ni hpe daw jau lu mu ga matu akyu hpyi na rai nga ai!

SEPTEMBER – (For the abolition of the death penalty)

Si ari dam hkrum sha nga ai ni a dam hpe shaprai kau ya mu ga matu akyu hpyi ga! Shinggyim ahkaw ahkang hpe tawt lai nna si ari dam jaw ai mungdan tara hpe dawm la mu ga matu akyu hpyi ga!

OCTOBER – (For a Church open to everyone)

Nawku Hpung a makam masham shinggyim masha shagu hta shachyam shabra lu u ga matu akyu hpyi ga! Atsam marai bang nna mungga htawn shana ya ai ladat hte hkaw tsun ya ai a marang e makau grupyin masha shada hkap la let nau na majing myit jasat hte galung kahkying gumding nga ai Nawku Hpung rai nga u ga matu akyu hpyi na rai nga ai!

NOVEMBER – (For children who suffer)

Ru yak shoi chyum hkrum ma kaji ni a matu akyu hpyi ga! Grau nna dum nta n lu ai ni, chya hkrai ma ni hte majan tsin-yam hkrum ma kaji ni a matu akyu hpyi ga! Shanhte ni hpe tinang a kun dinghku masha ni zawn hkam sha shangun let hpaji hparat sharing hka ja lu na matu garum pawn ba la ga.

DECEMBER – (For volunteer not-for-profit organizations)

Kaja wa sha ra kadawn ai ni a matu laksan ap nawng ai apnawng masha ni a matu akyu hpyi ga! Tinggyen wuhpung wuhpawng a akyu ara matu myit ai hpe tsun mayu ai n rai nga ai. Yawng a akyu ara matu myit nna n hkring n sa lam tam let ra kadawn ai ni hpe karum ai hta shang lawm ap nawng ai ni a matu akyu hpyi ai lam rai nga ai.

Ndai akyu hpyi yaw shada lam gaw mungkan ting a matu Madu Yesu a matsan dum lama ai masin salum hte akyu hpyi ai lam rai nga ai majaw Wa Sarabyin kaw nna Nawku Hpung ting hpe matsun dat ai mung rai nga ai.

Ndai zawn tau nau akyu hpyi yaw shada lam hpe 1844 shaning hta Jesuit Sasana kaw nna, dingda Fransik mungdan na Vals mare hta Ramma ni hpe shapan shalat na matu gaw gap da ai nta hta hpung woi ni shada matut mahkai akyu hpyi hpang wa ai aten kaw nna hpang wa ai lam chye lu ai. Grai dam lada ai hte akyu pyu ai ladat re majaw Nawku Hpung hta dai lam ni hpe matut manoi jai lang hpang wa ai rai nga ai.

1890 shaning hta, Wa Sarabyin Leo XIII gaw, Kahtawlik Makam mungkan ting dam lada ai hku chyam bra wa na matu yaw shada let dai shaning a shata shagu na akyu hpyi yaw shada lam hte maren akyu hpyi na matu yaw shada lam ni hte rau matsun laika shapraw matsun ai lam galaw lai wa ai.

1915 shaning hta, “Ramma hte Misa Hkungga ngu” nna dai ni anhte chye na ga ai ga baw ginlam hte akyu hpyi yaw shada lam hte maren akyu hpyi lai wa ma ai.2016, 2018, 2020, 2021 shaning ni hta mung akyu hpyi yaw shada lam ni hte maren akyu hpyi na matu matsun lam hta hkan nna akyu hpyi lai wa sai rai nga ai.

Daining 2021 shaning hta mungkan ting na mung dan 98 hta nga ai Kahtawlik Nawku Hpung masha wan 35 shang lawm nga sai lam chye lu ai.

Source: Vatican News

By Fr. Patrick Gawmaw Hkawng Yae

#vaticannews

#rvakachinservice