2021 Shaning Na Shata Shagu Na Akyu Hpyi Yaw Shada Lam Ni

Wa Sarabyin Masat Da Ya Ai 2021, Shata Shagu Na Akyu Hpyi Yaw Shada Lam Ni

January

Shinggyim Nau na Myit Jasat Nga Na Matu (Human Fraternity)

Makam n bung ai hpu nau ni hte hku hkau kanawn mazup lu ai myit masin hpe hpaw ya let rau shada akyu hpyi ya hkat na chyeju Karai Kasang jaw ya u ga matu yaw shada akyu hpyi ga.

February

Myu Shayi Ni Hpe Roi Rip Ai Lam Ni Hpe Ninghkap Ga (Violence Against Women)

Roi rip dang sha ai lam hkrum ai myu shayi ni a matu akyu hpyi ga. Shanhte, shinggyim wuhpung wuhpawng a, makawp maga ai hpe hkam la lu mu ga.

March

Prinem Htingram Lam Jaw Ai Mara Raw Chyeju Kumla Hkam La Ga (Sacrament of Reconciliation)

Karai Kasang a matsan dum lama ai hpe hkam la lu na matu Mara Raw Sakramentu chyeju kumla hpe hkam la lu mu ga, akyu hpyi nga ga.

April

Npawt Madung Rudi Ahkaw Ahkang Ni Lu La Na Matu (Fundamental Rights)

Gumshen Magam Asuya ni a npu kaw nga ai mung shawa masha ni yawng npawt madung rudi ahkaw ahkang, lu la ging ai ahkaw ahkang ni hpe hkam la lu na matu akyu hpyi ga. Democracy lu da ai raitim, dawsa ai lam ni, hte mayak manghkang ni nga taw ai mung shawa masha ni a matu akyu hpyi ga.

May

Mungkan Sut Masa Lam Hta Rawt Jat Wa Na Matu (The World of Finance)

Mungdan Asuya sut masa lam hta woi awn lit la nga ai ni teng man jaw ang ai hku hparan sa wa lu mu ga hte mung shawa masha ni a sut masa lam rawt jat wa na matu akyu hpyi ga.

June

Kun Dinghku De Ai Hta Jaw Ang Ai Tara Hte Tsawm Htap Ai Hku Gaw De Sa Wa Lu Mu Ga Matu (The Beauty of Marriage)

Hkungran kun dinghku de na matu shajin shachyip nga ai Ramma shayi shadang sha ni a matu akyu hpyi ya ga. Hkristan wuhpung wuhpawng a garum shingtau ya ai a marang e shanhte gaw tsaw ra ai hta, shawang myit kaba ai hta, shada kam hpa sadi dung ai hta, myit galu kaba hkam sharang ai hta kung hpan wa mu ga matu akyu hpyi ya ga.

July

Shinggyim Hku Hkau Kanawn Mazum Lam A Matu (Social Friendship)

Shinggyim lam yan, sut masa lam yan, mung masa lam yan ni hta n ru n ra byin nga ai kaw nna lawt lu ai mahkrun lam ni rai nga ai shada man hkrum hkrum shaga bawngban ai lam hpe nau na myit majing hte gaw de sa wa lu ai atsam shinggyim wuhpung wuhpawng shagu hkam la lu mu ga matu akyu hpyi ga.

August

Nawku Hpung A Matu (The Church)

Nawku Hpung gaw Chyoi Pra ai Wenyi hpe hkam la let Shi a chyeju kumhpa hte atsam marai hpe mung hkam la lu nna, Kabu Gara Shiga a Nhtoi tai nga na matu akyu hpyi ga.

September

Makau Grupyin Tsawm Htap Ngang Grin U Ga Matu (An Environmentally Sustainable Lifestyle)

Makau grupyin shingra tara asak galu ngang grin tsawm htap nga na hpe madung da lata sa wa lu mu ga hte dai Karai Kasang hpan da ai hte maren tsawm htap ai makau grupyin hpe hkap la manu shadan makawp maga let anhte a sak hkrung lam hpe lata la chye na matu akyu hpyi ga. Ramma ni mung dai makau grupyin shingra tara hpe jahten shaza ai lam n nga na myit daw dan da ai lam ni hpe hkrap tup hkan sa let dai hta kabu pyaw lu mu ga matu akyu hpyi ga.

October

Sasana Magam Gun Ni A Matu (Missionary Disciples)

Kashin Kamun Chyeju kumla hkam la da sai ni yawng gaw Kabu Gara Shiga gat hkai sasana galaw ai magam hta Karai Mungga sakse ni tai nga lu mu ga matu akyu hpyi ga.

November

Myit kaji garen nna gawngrun ai ni a matu (People Who Suffer from Depression)

Myit kaji garen nna gawngrun ai ni, shanhte a prat hta nhtoi hpe bai lu la mu ga, shalan shabran garum shingtau lam hpe hkam la lu mu ga matu akyu hpyi ga.

December

Tarahkaw Sara/Num, Tara Laika Sharin Ai Ni A Matu (Catechists)

Tara Laika sharin ya nga ai Tarahkaw Sara/num ni hte Karai Mungga htawn shana ya ai ni gaw Chyoi Pra ai Wenyi a chyeju atsam hte shanhte a sakse hkam ai lam ni yawng akyu pru apu asi ni tai nga mu ga matu akyu hpyi ga.

Ndai akyu hpyi yaw shada lam hpe United States Conference of Catholic Bishops (USCCB’s) kawn ndau da ai rai nga ai.

By Fr. Patrick Gawmaw Hkawng Yae

#usccb

#rvakachinservice

https://www.usccb.org/prayer-and-worship/prayers-and-devotions/the-popes-monthly-intention