2019 Ning Mungkan Ramma Nhtoi gaw Makam Masham Shaleng ai Poi Kaba Rai na re

Du wa na 2019 ning Jan shata Panama mungdan hta galaw na lajang nga ai Mungkan Ramma nhtoi poi kaba gaw makam masham shaleng ai poi kaba rai na re, Wa Sarabyin hte shi gun sa wa na America ka-ang Mungdan ni a matu myit mada lam ni hpe ala nga saga ai, nga nna Panama Saradaw kaba José Domingo Ulloa tsun dat nga ai.

Lai wa sai bat lahkawng ya, December 11 ya shani Roma Mare hta galaw ai Mungkan Ramma nhtoi poi kaba hte seng nna shajin lam galaw ai lam ni hpe shiga dap ni de tsun sang lang lam galaw ai lamang hta lahta na zawn Panama Mungdan Saradaw kaba tsun dat ai rai nga ai.

Matut nna Panama Saradaw kaba tsun ai hta, “Panama Mungdan hta galaw na lajang nga ai Mungkan Ramma nhtoi poi kaba a ga manoi gaw Luke 1:38 hta na “Yu u, Madu a mayam jan ngai rai nga nngai; na a ga hte maren ngai hta rai wa u ga,” ngu ai chyum mungga rai nga ai, poi lamang hpe 2019 ning Jan 22 kaw nna 27 ya shani du hkra galaw na, Wa sarabyin Francis gaw Jan 23 ya shani du sa wa na re, bu htawt hkawm masha ni hte seng ai lam, buga nga masha ni hte seng ai lam, makau grup yin shingra tara hte seng ai lam, amyu shari sha ni a lit lamang ni hte seng ai lam ni, ndai ga baw ni gaw poi lamang laman madung tsun shaga na ga baw ni rai wa na re,” nga nna Panama Saradaw kaba stun dat nga ai.

Mungkan Mungdan 155 kaw nna ramma dat kasa ni marai 200,000 jan du sa wa na re, hkum tsup hkra mying jahpan bang da sai ni marai 47,000 rai nga sai, sa du na nga nna shiga jaw da ai ni marai 168,000 rai nga sai, jahpan nbang ai sha sa du ai ni mung lawm wa na rai nga ai majaw sa du shang lawm na masha jahpan grau law wa na masa rai nga ai, Miwa gum san Mungdan kaw na marai 243, Cuba Mungdan kaw nna 450, bai Jordan hte Palestine mungdan ni hkan na Muslim Ramma ni mung sa du na shang lawm na rai ma ai, poi lamang a matu hkyen lajang na, garum la na ni gaw Brazil, Costa Rica, France hte Poland mungdan ni hkan na Ramma ni marai 37,000 rai ma ai, nga nna shiga dap ni de tsun sang lang galaw ai hte Panama Saradaw kaba tsun dat nga ai lam Vatican shiga dap kaw nna shana dat nga ai.

Source : Vatican News