“Matsan Mayan Ni Hte Kau Da Hkrum Ai Ni Gaw Nanhte A Sara Ni Rai Ma Ai”

Friars Minor Sasana Hpung Ni Hpe Wa Sarabyin N-Gun Jaw:

“Franciscan Order of Friars Minor” Asisi kaw na San Francis a kasi ningli hpe hkan nang let ap nawng sasana galaw ai hpung ni a zuphpawng kaw shang lawm ai ni hpang de Wa Sarabyin Francis, hkrang mu nsen, Video message hpe July 17 ya shani shagun dat ai lam dai shani na Vatican Shiga hta ndau da ma ai.

Franciscan Order of Friars Minor sasana hpung ni law law nga ma ai rai nna, shanhte gaw n dan n dawng ai hku, kadai n mu mada ai hku, kaji htum ni ngu hkam la let kaja wa ra kadawn nga ai ni hpe garum shingtau nga ai ni rai ma ai lam chye lu ai.

Wa sarabyin Shanhte hpe shadum n-gun jaw ai hta, nau na myit majing hte yu maya prat hta kabau pyaw let ap nawng sakse hkam dingyawng rai nga na matu, shanhte a yaw shada pandung shingran hpe jum tek da la hpawtni ngu ai du na ra ai aten ni hta mung dai prat hte sha sakse hkam sa wa na matu n-gun jaw da nga ai.Friars sasana hpung ni hku ap nawng taw nga ai ni gaw kaning re ai ahkying aten hta mung Karai Kasang hpe shakawn shagrau chye ai hte chyeju mung dum chye ai ni rai ma ai, ngu mung Vatican shiga dap kaw nna tsun da ma ai.

Wa Sarabyin a mungga hta Ehp 5:14 kaw na San Pawlu tsun da ai, “Yup pyaw ai wa e rawt u, si ai kaw na bai rawt wa nu; Hkristu gaw nang hpe jahtoi jaw na ra ai,” ngu ai shadum n-gun jaw ga hpe lakap nna n-gun jaw da nga ai.  Yaw shada lam “vision” hpe gram shatsawm let matsan mayan ni hte kau da hkrum ai ni hpe Karai Kasang hte shachyen ya ga, dai gaw shawng de mada yu ai mung rai nga ai, ngu nna mung n-gun jaw da nga ai.

"Matsan mayan ni hpe sa hkrum mu, mungkan ga hpe makawp maga mu, simsa lam a matu bungli galaw mu, prinem htingram lam hpe galaw mu"

ngu mung n-gun jaw da nga ai.

Dai zawn galaw ai hta hkrum hkrit na matu mung n-gun jaw da ai. Dai gaw Friars Minor ni a sasana magam nan rai nga ai; Madu Hkristu a Kabu Gara Shiga hpe hkaja hkan nang ra ai lam, myit gahpra hkrit kajawng ai lam ni n mai nga ai lam, myit masin hta ningnan re ai Karai kasang jaw ya ai sasana magam ni hpe hkap la gun hpai ra ai lam ni hpe mung tsun shadum da ai.

Hpang jahtum mungga hta Friars Minor a sut su ai lam gaw wenyi lam yan rai nna, Kabu Gara Shiga hta ru jung nga na matu akyu hpyi let, nau na myit ni, matsan hkam ai lam ni, kaji kadun ai hku shagrit shanem let nga pra ap nawng ai lam ni yawng gaw matsan mayan ni, kau da hkrum ai ni, htawt si nga hkawm ra ai ni, ya na prat a mayam madang nga ra ai ni yawng hte nihtep ai hku nga lu hkra shakut ra ai lam, shanhte gaw sara ni rai ma ai; San Francis galaw lai wa sai zawn sha shanhte hpe hkap ahpum, sa ahpum, bu hpun nga mu, ngu Wa Sarabyin Francis, The Franciscan Order of Friars Minor” hpung ni hpe sang lang n-gun jaw da nga ai hpe Vatican Shiga Dap kaw nna ndau da ma ai.

By Fr. Patrick Gawmaw Hkawng Yae

#vaticannews #rvakachinservice

Source: Vatican News