“Lama Na Ngai Hkring Sa Mat Ai Raitim, Roma Kaw Hkringsa Saradaw Langai Hku Matut Nga Nga Na Re”, Ngu Wa Sarabyin Francis Tsun Da

interview hpe, July 12 ya shani, hkap la galaw lai wa ai sai lam Vatican Shiga Dap kaw nna ndau da ma ai.

Dai hkrum shaga lamang hta, Wa Sarabyin Francis a hkamja lam a majaw hkringsa na lam hte seng nna mung, chyambra ana hte seng nna mung, Ukraine majan hte seng nna mung hkrum shaga jahta ma ai lam chye lu ai.

“Ya du hkra gaw hkring sa na n myit da shi ai” nga nna Televisa Univision’s ViX na shi la Maria Antonieta Collins hte Valentina Alazraki yan hte hkrum shaga ai shaloi tsun dan da ai.

Univision Noticias Youtube channel hta Wa Sarabyin Francis a hkamja lam a majaw Lit magam kaw nna hkring sa na masin nga ai shiga  pru ai wa ai rai nga ai lam mung chye lu ai.

Wa Sarabyin gaw “Karai Kasang ngai hpe dai lam hte seng nna garai n san shi ai, ngu hkam sha ai; Shi san ai ngu, ngai sumru hkam la jang gaw she n rai wa na i”, nga nna san htai hkrum shaga ai hta tsun da ai.

Hkamja Lam Masa

Lahput machyi ai hte seng nna, Wa Sarabyin gaw, naw machyi ai raitim, mai jat wa ai zawn gaw hkam sha ai, ngu tsun da ai.

“Lai sai ten hta ngai hta n-gun n rawng ai zawn nga hkam sha ai raitim, 20 ya hpang gaw grai tsamai wa ai,” ngu mung tsun da ai.

“Hkring sa wa sai Wa Sarabyin Benedict XVI a kasi hpe mung yu la hkam la ai. Shi a kasi gaw jaw ang ai daw dan lam hpe galaw lu na re ngu myit mada ai,” nga nna mung tsun dan ai.

Hkring sa wa sai Wa Sarabyin hpe shagrau sha-a ga tsun da ai. “Shi a mai kaja ai lam ni, myit sumru akyu hpyi ai lam ni gaw Nawku Hpung hpe makawp maga gaw sharawt ya ai lam rai nga ai; Mater Ecclesiae Monastery kaw nga ai shi kaw sa dam sa kawan shagu myit pyaw lam lu ai,” ngu sakse hkam da ai.

Hkring sa Wa Sarabyin Benedict XVI kaw shawng na lang sa dam ai mahkrup madup gaw shi hpe akyu kaba jaw ai; hpa majaw nga yang, shi gaw seng seng san pra ai hte ningmu kaba ai, tsun shaga ai hta si mani ai wa rai nga ai, ngu mung matut shakawn da ai.

Karai Kasang jaw ya ai aten gaw shi hpe grau kaja wa shangun na ra ai; hpang de grau kaja wa na hpe mung kam ai, nga nna tsun da ai.

Lama na hkring sa ai rai yang mung, shi a dai dawdaw buga Argentina de n wa na re lam, Roma Saradaw re ai majaw Roma Saradaw hking sa ai wa hku nna nga na re lam, dai shaloi San John Lateran Nawku Htingnu Wang hta nga lu na myit mada ai lam mung matut tsun da ai.

Saradaw kaba Buenos Aires a lam mung tsun shalawm da ai. Saradaw Buenos Aires gaw shi a hkring sa na hte seng nna shajing magang nga sai rai nna, dai gaw shi a matu kaja ai, grau nna gaw, mara raw sakramentu law law dung madat ya lu wa na hte machyi makawp ni hpe mung grau kawan katsan lu na rai nga ai; dai gaw shi a sagu rem magam langai naw rai nga ai; shi nga ai shara kaw na sagu hpung masha ni hpe matut daw jau nga na ra ai; shi hkum nan hkring sa wa yang gaw dai hte maren galaw let myit pyaw lam lu la na re, nga nna Wa Sarabyin, shi a ningmu hpe tsun dan da ai.

Hkrum shaga lamang ‘interview’ hta ndai prat hta byin nga ai masa lam law law hpe mung tsun dan da ai: kap bra ana lam, mung masa lam, majan lam, masha sat amu lam (abortion), sut masa lam ni hte seng ai lam ni tsun da ai.

Shi a sagu hpung masha ni hpe kawan masing, Italy, Assisi Mare Hte Dingda Matera De Sa Du Kawan Na lam hte hkam ja lam a majaw jahkring da ai Dingda Sudan hte Democratic Republic of Congo Hkrunlam hpe mung bai galaw lu na myit mada nga ai lam hpe mung tsun dan da ai.

By Fr. Patrick Gawmaw Hkawng Yae

#vaticannews

#rvakachinservice

https://www.vaticannews.va/en/pope/news/2022-07/pope-francis-interview-televisa-univision-resignation.html