‘Auschwitz-Birkenau’ Ngu Ai Nazi Ni A Masha Sat Dabang Dawm Kau Ai Ladu Hkrum Nhtoi Hta, Myit Dum Akyu Hpyi Lam Galaw Na Matu Wa Sarabyin Tsun Lajin

‘Auschwitz-Birkenau’ Ngu Ai Nazi Ni A Masha Sat Dabang Dawm Kau Ai Ladu Hkrum Nhtoi Hta, Myit Dum Akyu Hpyi Lam Galaw Na Matu Wa Sarabyin Tsun Lajin

Nazi ni masha nat sat sharu lam galaw lai wa ai ‘Auschwitz-Birkenau’ ngu ai masha sat dabang dawm kau lu lai wa ai 75 ning ladu hkrum nhtoi shani hta, dai lam ni hpe myit dum akyu hpyi lam galaw na matu Mungkan masha ni yawng hpe Wa Sarabyin Francis kaw tsun lajin dat nga ai.

Holocaust ngu ai masha wan lam hte ru nna nat sat sharu lam galaw lai wa ai hkrit hpa tsin yam mabyin hpe ndum nmai rai tawn da kau na ngu ai lam gaw hkap la lu mai lam nrai, myit dum lam galaw nga ra ai nhtoi rai nga ai, nga nna Jan 26 laban shani San Peter pa kaba hta Mungga shaga ai shaloi Wa Sarabyin tsun dat nga ai. 

Wa Sarabyin tsun ai hta,

“January 27 ya, Bat langai ya shani gaw ‘Auschwitz-Birkenau’ ngu ai Nazi ni a masha sat dabang dawm kau lu lai wa ai 75 ning ladu hkrum nhtoi shani rai nga ai, ndai shani hpe anhte nmai malap kau ga ai, masha law law Nazi ni a lata hta ‘Holocaust’ wan nat sharu hkrum lai wa ai mabyin hpe nmai malap kau ga ai, byin lai wa sai hkrit hpa mabyin lam ni hpe bai myit dum sumru yu ai lam ni galaw let, ndai zawn re ai mabyin ni kahtap nna bai nmai byin shangun na re, ngu nna anhte a myit masin hta tsun let akyu hpyi lam galaw ra ai nhtoi rai nga ai”

 nga nna Wa Sarabyin tsun dat nga ai lam Vatican shiga dap kaw nna shana dat nga ai.  

Source: Vatican New