​Wa Sarabyin: Sumtsan Salang Dakkasa Ni Simsa Lam Shabyin Ai Ni Tai Nga Mu

image from Vatican website

December 15, bat mali ya shani, Wa Sarabyin Francis, Ambassadors to "The Holy See", Sarabyin Rung "the Holy See" hte matut mahkai ai sumtsan salang dakkasa ningnan ni hpe lit shatsam da sai lam chye lu ai. Shan hte hpe hkalum ga tsun let Wa Sarabyin Francis, shinggyim kun dinghku ting a matu, yawng a kaja ai hpe galaw gunhpai na lit nga ai lam, mungkan jut shara shagu, grau nna nsin chyip re ai shara ni hta ninghtoi jahtoi ya na matu myit mada ai lam, shanhte hpe shadum jahprang let hpyi shawn da ai.

Sumtsan salang ningnan ni gaw Belize, Bahamas, Thailand, Norway, Mongolia, Niger, Uganda hte Sudan hte matut mahkai ai sumtsan salang ni re lam chye lu ai.

Gumshen ai lam, n ru n ra byin ai lam ni a majaw mungkan shara shagu hta yak hkak jam jau hkrum sha nga ai manghkang kaba nga ai ten rai nga ai hte maren, lit nga ai ni gaw mungkan mungdan shagu hte matut mahkai mahkri shawn, magam rau gun na gaw shawoi na hta grau ra kadawn nga ai, nga nna Wa Sarabyin sanglang myi jahpaw da ya ai.

Simsa lam gaw de ai ni

Mungkan mungdan shagu hte seng ai tara ni hpe tawt lai ai lam ni gaw "masum lang ngu na mungkan majan shabyin nga ai ngu tsun mai nga ai; dai majaw sumtsan salang dakkasa ni a lit magam gaw grai ahkyak ai kaw lawm nga ai; masum lang ngu na mungkan majan gaw simsa lam hpe jahten sharun kau wa nga ai; mungkan n kau ni hta gumshen ai, n ru n ra byin, manghkang byin nga ai. Simsa lam gaw kaja grau ai shawng lam rai nga ai; matsan mayan ni a myit mada shara re ai zawn, mungkan masha yawng a myit mada shara mung rai nga ai. Anhte a prat, aten hta hkan nna zet zet ja ja rai sadi maja let hparan sa ra ai, nga nna mung Wa Sarabyin shadum jahprang da ai.

Htung Hking, Lailen Law Ai Hte Shai Hkat Ai Lam

Labau hta mung, ndai prat hta mung, buga ginra hta hkan nna, shinggyim myu ni hta hkan nna mung htung hking, lailen shai hkat ai lam ni nga nga ai. Dai hpe chye na hkap la nna shinggyim masha yawng a matu grau kaja ai hta mahkri shawn kahkyin gumdin nga pra lu na hpe madung da hparan hpajang sa wa ra ai.

Anhte a hkum tsup grau ai sawk sagawn lam ni, atsam ni gaw Karai Kasang kaw na chyeju ni rai nga ai. Dai lam ni hpe jai lang let dam lada ai mungkan hpe daw jau sa wa ra ai; shinggyim myusha ni a kaja grau na matu rai nga ai, nga nna mung sanglang da ai.

Hkala hkra loi grau dik ai lam ni hpe ahkyak madung da myit maju jung let htep lahti hparan sa wa ra ai re majaw dai masa hta shakut ai gaw shinggyim ahkaw ahkang madung hpe makawp maga shatsaw sharawt ai tai nga ai, nga nna mung tsun da ai.

Lu hka, malu masha, hkamja lam npawt ni: ndai ni gaw ra ai hta hkan nna rap rap ra ra hkam la ging ai; yang a matu sharap shara lu ai mahkrun lam hpe tam nna tatut hkrang shapraw sa wa ra ai.

Machyi makaw ai ni, n kung n kyang ai gaw ningja ni gaw shanhte a ahkaw ahkang n lu re ai lam chyahkring hkring hkrum sha ma ai; shanhte a ahkaw ahkang a matu myit maju jung let shakut ya ra ai, ladat tam nna shanhte hpe mung makawp maga ra ai, shanhte a shawng lam matut ngang grin ai mahkrun lam tam ya ra ai, nga nna mung shadum da ai.

Sumtsan salang dakkasa ni gaw nsin chyip re ai mungkan ju shara shagu hta n'htoi jahtoi ya nna, nsen n pru ai ni a nsen hpe shapraw ndau shana ya lu ai. Kahkyin gumdin ai hte shinggyim mahku mahkau lam ni hpe shatsaw sharawt na matu laklai tsawm htap ai ningnan re ai kaja ai ladat ni hpe tam sagawn nna tatut hkrang shapraw sa wa mu, nga nna Wa Sarabyin Francis, "the Holy See" sumtsan salang dakkasa ningnan ni hpe shadum jahprang saw shaga da nga ai.

 

By Fr. Patrick Gawmaw Hkawng Yae

#vaticannews

#rvakachinservice

https://www.vaticannews.va/en/pope/news/2022-12/pope-audience-new-ambassadors-holy-see-peace.html

 

Add new comment

5 + 5 =