Newzealand Mungdan Simsa Lam A Matu Akyu Hpyi Ya Na Lam Wa Sarabyin Tsun Lajin Dat Nga Ai

Newzealand Mungdan na Muslim Nawku Jawng Pali lahkawng hta masha unawng uwa gap sat sharu lam byin pru ai hpang, Newzealand Mungdn kata nju ndawng hkat lam ni hpe manga kau nna simsa lam nga wa hkra akyu hpyi ya na matu lajin ai lam Wa Sarabyin tsun dat nga ai. Lai wa sai laban shani, San Peter pa kaba hta shani ka-ang Angelus akyu hpyi woi ngut ai hpang lahta na zawn Wa Sarabyin Francis tsun dat ai lam rai nga ai.

Wa Sarabyin tsun ai hta, “dai ni na prat aten, majan hte kasat gala mang hkang lam ni a majaw shinggyim masha ni a ntsa du pru nga ai nji nmu lam ni garai nlu shazim kau shi nga aten, Newzealand Mungdan Christchurch ngu ai shara na Muslim Nawku Jawng Pali lahkawng shara hta masha sat sharu lam hkrit hpa mabyin bai byin pru nga ai. Asak si hkrum lai was ai ni, hkala hkrum ai ni hte, yawn hkyen hkrum nga ai nta masha ni a matu akyu hpyi ya nga nngai. Muslim hpu nau ni hte mung, dai ginra na masha ni hte mung myit hpawm nga nngai. Nju ndawng jahten shaza lam galaw ai magam bungli ni hpe ning hkap ai lam ni galaw na matu hte akyu hpyi ya lam galaw na matu kahtap nna bai tsun lajin mayu nngai” nga nna Wa Sarabyin tsun dat nga ai.

Ya na zawn akyu hpyi ya na matu Wa Sarabyin kaw nna saw lajin lam tsun ngut ai hpang, Wa Sarabyin hte rau San Peter pa kaba hta du hpawng nga ai masha ni yawng kaw nna, chyahkring mi azim sha nga nna Newzealand mabyin hta asak si hkrum kala hkrum lai wa ai ni a matu akyu hpyi ya ai lam galaw lai wa ma ai.         

Newzealand Mungdan Chrischurch ngu ai mare na Pali shara lahkawng hta byin lai wa ai sinat hte gap sat sharu bun lam mabyin hta, masha marai 50 sat hkrum lai wa ai. Ndai gaw Newzealand Mungdan labau hta sawng dik htum ai mabyin re, kaga marai 50 mung hkala hkrum lai wa ma ai, dai ni hta na marai 12 gaw grai sawng ai masa re, asak 4 ning daram sha re ai num sha ma langai mung grai sawng ai masa hkala hkrum nna ma kaji tsi rung hta gawn lajang lam galaw nga ma ai, nga nna Vatican shiga dap kaw nna shana dat ma ai.

Source:Vatican News