Myanmar Mungdan Hpyen Hpung Ni A Laknak Hte Ma (35) Lahta De Sat Hkrum Sai Jahpan UNICEF Tsun Ai Hpe Vatican Kawn Mung Ndau Da Ai

March 29, 2021, ya shani na Vatican shiga hta Myamar Mungdan hpyen hpung ni a laknak hte ma marai (35) lahta de sat hkrum sai lam lawm wa ai. Ndai shiga gaw Myanmar Hpyen Dap kawn hpyen gumshen ai ladat, sinat laknak ni hte mung shawa ni hpe jahkrit shama jahten sharun ai majaw hkrat sum mat ai mung shawa masha 500 daram gap sat hkrum ai hta lum ai rai nga ai. Dai zawn ma ni hpe sat ai amu gaw kaba dik tara tawk lai lam langai re ngu UNICEF kaw shadum sadi jaw ai ndau laika “statement” tsun da ai.

Dai statement hpe ma shapan shalat alu mahkawng hpung hpa-awn, Henrietta Fore (Director-General of the Children’s Fund) kawn UNICEF website kaw mara da nna seng ang ai ni hpe sadi jaw da ai hpe Vatican kaw nna tsun dan da ai.

UNICEF kaw nna sawk sagawn da ai jahpan hte maren nga yang, ma 35 sat hkrum sai, sawng dik hkala hkrum ai masha mung hti n dang sai, ma 1000 daram hte shiga la shiga jaw ai ni hpe hpyen dap hte balik dap kaw nna rim la ai hte zingri ai lam ni, hkyuhtawng sharawng ai lam ni galaw nga ai; ma ni hte ramma ni hpe gumshan ai hpyen dap hte balik dap ni e n tara ai hku jahten sharun nga ai majaw shanhte a hkum hkrang myit masin hkam ja lam hte myit rawt myit mada lam ni hpe dingbai dingna jaw jahkrit shama hkrum nga ma ai.

Ya na zawn mara kata ma ni hte masha sat ai amu gaw Myanmar mungdan kata aten galu hkra machyi kaba byin shangun ai; Ma ni a asak hte masha asak shimlam a matu makawp maga na malai hpyen dap hte balik dap kaw nna shimlam la ngu ai ga baw hte shanhte hpe sat ai amu galaw nga ma ai hpe na chye lu ai majaw mau n ma yawn kaba yawn ai lam Henrietta Fore tsun da nga ai.

 “Ma ni a shinggyim ahkaw ahkang hte seng nna lit la makawp maga nga ai ni lawan dik ai hku ahkyak la sa wa ra sai” ngu UN Secretary-Gutterres tsun da sai hpe mung madi shadaw ai lam Henrietta Fore tang shawn da ai.

Shi tsun dan ai UNISEF a sawk sagawn jahpan hta myanmar mung masha seng mi (100,000) daram gaw Covid-19 makawp tsi htu na gara hku n mai byin ai; ma seng manga (500,000) daram gaw vitamin A n-gun yawm taw ai; ma seng shi lahkawng (1,200,000) daram gaw hpaji jawng lahkawng ning n lu lu na masa hta nga ai; mun mali (40,000) lahta na ma ni gaw ra kadawn ai malu masha nan n hkam la lu ma ai; seng lahkawng e mun matsat (280,000) daram re ai ma ni gaw shanhte a hkum hkrang na matu ra kadawn ai hka hte kaga san seng lam ni hpe n hkam la lu ma ai.

Shimlam la jahpai hpai nna masha sat ai amu ni hpe ya jang jang jahkring da ra sai lam, mungdan simsa lam hte tara rapra lam a matu myit nna gumshen ai ladat hte masha sat amu hpe tawn da ra sai lam, ma ni a matu bungli galaw ai ni, tsi magam gun ni, hpaji lam woi ai sara/num ni hte rau mungdan rawt jawt lam a matu shakut taw nga ai ni hpe makawp maga ra sai lam ni hpe madung da myit sa wa na matu mung shadum n-gun jaw da ai.

Myanmar mungdan hta ma ni a matu ra ai lam ni hta garum na matu alu tam lam hpe UNICEF kaw nna galaw hpang wa sai lam hte Myanmar mungdan na ma ni dingbai dingna yak hkrak hkrum ai lam ni n hkrum n hkra na matu myit bang let shanhte a shawng lam a matu jawm shakut ya ga ngu UNICEF Executive-Director ga hpumding tsun da ai ndau shabra laika “statement” hpe Vatican Shiga Dap kaw nna mung ndau da ya ma ai hpe RVA Jinghpaw Nsen Shapoi Dap kaw nna bai ndau dat ya dat ga ai.

By Fr. Patrick Gawmaw Hkawng Yae

#unicef

#vaticannews

#rvakachinservice

Source: Vatican News