Muslim Makam Masham  De Atik Anang Jashawn Bang Ai Hpe Nawku Hpung Kaw Na Ninghkap

Pakistan Mungdan na Hkristian hte Hindu amyu shayi num sha ni hpe Muslim hpung kale na matu ating anang galaw nga ai lam hpe Nawku hpung a garum ningtum uhpung langai rai nga ai “Aid to hte Church in Need” uhpung kaw nna ja ja tsun ninghkap mara shagun lam galaw dat nga ai.

“Aid to hte Church in Need” uhpung kaw na, mani bat mali ya shani shiga dap ni hte hkrum nna mabyin ni hpe tsun sang lang lam galaw lai wa ma ai. Catholic tara kasa langai rai nga ai Tabassum Yousaf kaw nna shiga dap de tsun shana ai hta,

 “atik anang rim makoi la hkrum ai, hkum shan aroi arip di hkrum ai, Muslim hpung kale na matu adip arip galaw hkrum ai num sha ma ni shaning shagu marai 1,000 daram nga nga ai. Nkau mi nga yang shanhte hpe aroi ara zingri ai la ni hte atik anang hkungran la shangun hkrum ai” nga nna tsun dat nga ai.    

Ndai zawn re ai mabyin lam ni hpe masha ni grau chye wa mu ga yaw shada nna “Aid to hte Church in Need” uhpung kaw nna woi awn let shiga dap ni hkrum shaga tsun sang lang ai hpawng galaw ai lam rai nga ai. Dai hpawng hta Pakistan Mungdan Cardinal Joseph Coutts mung sa du dung lawm ai zawn Muslim ningbaw ni law law mung sa du ma ai rai nga ai.

Adip arip di hkrum ai mabyin langai hpe madi madun ga nga yang, lai wa sai July shata hta sha, asak 14 ning daram re ai Hkristian num sha langai Lahore mare kaba hta atik anang rim la hkrum ai, de a hpang shi hpe rim gyit da ai masha wa hte atik anang hkungran la shangun ai, de a hpang dai num sha ma gaw Muslim hpung kale mat sai hte tara shang jahpan bang sai lam pyada ni kaw nna kanu kawa ni hpang de shana wa ma ai mabyin rai nga ai.

Pakistan mungdan a tara hta, num sha ma ni a tara shang hkumran mai ai asak gaw 16 rai nga ai, ndai hpe mung 18 ning de sit nawt lu na matu “Aid to hte Church in Need” uhpung kaw nna matut nna shakut ding yang galaw rai nga ai, nga nna Vatican shiga dap kaw nna shana dat nga ai.        

Source :Vatican News