“Hpan Da Ai Lam A Ladaw” The Season of Creation ngu ai ga baw hte Online Mahkawn Ka Shing Jawng Poi Galaw

Poster

September 1 kaw nna October 4 du hkra Karai a Hpan Da ai lam a shata hku nna Munkan ting masat da ai hte maren Catholic Students Action Myitkyina (CSAM) ngu ai Myitkyina  Kahtawlik Jawngma shamu shamawt uhpung hku woi awn let hpan da ai lam hte seng ai Mahkawn Ka shingjawng poi lamang hpe online hku nna galaw lai wa ma ai.

 

Ya ten Mungkan hta byin taw nga ai lam ni hpe madi madun lu ai, Mungkan Ga Gaw Anhte A Nta” hte Karai Kasang A Nta” re hte Mungkan ga hpe yureng makawp maga maga na lit yawng hta nga ai” ngu ai lam hpe myit jahpaw htawng madun ya lu ai mahkawn ni hpe ka shalat let tinang nan (Shnr) manaw manang langai ngai hpe hkawn shangun nna myi man hkrang lawm ai video clip hku gayat nna san da ai seng ang ai masha hpe sa ya ai hku shingjawng poi galaw ai re lam chye lu ai.

 

Shanglawm shingjawng ai masha 10 jan nga ai hta na 1st  langai kum hpa hpe “Rau Jawm Lakawn Ga”  ngu ai mahkawn hte Maina RC IDP Camp kaw nga ai Shadang Nkawng Awng Myat lu mat nna, numbat 2nd kum hpa hpe Putao kaw nga ai La Tawng ka shalat nna Dan Hkawng hkawn da ai “ Tan Pho Hta Hpan Sinn Let Ya’ (တန်ဖန်းထား ဖန်ဆင်းလပ်ရာ) ngu ai mahkaw hte numbat 3rd kum hpa hpe Shatapru Jau Ginwang na Yaw Sau ka shalat nna Zan Dan Awng hkawn da ai “ Kabar May Gyi Ku Thing Thing Su” (ကမ္ဘာမြေကြီးကို ထိန်းသိမ်းစို့) ngu ai mahkawn ni hte lu mat ai lam chye lu ai. Numbat langai kumhpa hpe gumrhpaw lap 100,000 kyats, numbat lahkawng kum hpa 75000 kyats, Numbat masum kumhpa 50,000 kyats shagrau nna,numbat 4 kawn 10 du hkra hpe  30,000 kyats, shang lawm kumhpa 20000 kyats shagrau jaw ya sai lam chye lu ai.

 

“Shingjawng poi rip kawp tara hta  Myitkyina Saradaw Ginwang kata na Kahtawlik Hpung masha rai ra na hte asak 18-28 ning lapran na Dakkasu Jawng ma ni shanglawm shingjawng mai nna, Yungwi shingni lam hta shang tsap taw sai yungwi ninghkring ni hpe shang lawm shingjawng ahkang njaw da ai hte Mahkawn hpe Jinghpaw ga / Myen ga / hte English hku shing nrai yawng kayau nna mung ka let shingjawng mai ai ngu masat da ai hte aten mung kadun mat ai majaw shang lawm ai ramma ni nau n law ai re” nga nna lamang hta Volunteer galaw ai CSAM kaw na Shadang Columban Tu Hkawng tsun ai.

 

Ndai lamang hpe Columban Wa Jau ni madi shadaw ya ai rai nna Myitkyina kaw apnawng magam gun nga ai Columban Wa Jau Kurt Zion V.Pala nan woi awn nna Sara Peter Mar Zaw, Mama Hka Raw hte Shadang Joseph Lawt Nu ni kawn tara agyi galaw ya ai re lam chye lu ai. ( Wa Jau Curt Zion V.Pala a nsen)

 

Septmeber shata praw 1 ya shani gaw Karai Kasang a hpan da ai lam ai lam a matu akyu hpyi ai nhtoi re ai hte October shata praw 4 ya shani gaw Makau gyup yin shingra tara hpe tsawra makawp maga ai wa, San Pra Francis Assis a nhtoi rai nga ai. San Francis Assisi a poi nhtoi shani mung “Healthy Planet, Healthy People Petition” ngu ai Mungkan shingra tara hpe makawp maga ai lam hte seng ai online shawk shawn laika hpyi lajin ai lata masat htu mahkawng ai lam Myitkyina Justice and Peace “ Simsa lam hte tara rap ra lam rung kawn woi galaw lai wa sai lam chye lu ai.

 

Dai ning 2021 ning na masat da ai Hpan Da Ai Lam shata a ga manoi gaw “ Mungkan ga gaw anhte yawng a nta re, Karai Kasang  a nta hpe nnan bai gawde ga” ngu ai rai nga ai.

 

Mung Hpan

Add new comment

13 + 2 =