![](https://kachin.rvasia.org/sites/default/files/cq5dam.thumbnail.cropped.1500.844.jpeg)
Africa Mungdan Masum De Gawan Na Matu Wa Wara Byin Francis Vatican Kaw Na Rawt
Africa Mungdan masum de sa du gawan na hkrun lam a matu, Wa Sarabyin Francis gaw dai ni September praw 4, bat masum ya shani Vatican kaw na rawt sai lam chye lu ai.
Sinpraw Africa Mungdan ni rai nga ai Mozambique, Madagascar hte Mauritius Mungdan ni de September 4-10 ya laman sa du gawan na rai nna, shi du nga ai laman Mozambique hta shara 5 , Madagascar kaw shara 8 hte Mauritius kaw 2 lang mungga hkaw tsun shaga na rai nna, Mungdan ningbaw ningla ni, Nawku Hpung magam gun ni hte hkrum shaga ai lam ni galaw mat wa na re ai lam chye lu ai.
Ya na zawn Wa Sarabyin Franics sa du gawan ai lam gaw, shi Sarabyin tai ai hpang Africa Mungdan ni de sa gawan ai mali lang re sai rai nga ai. Lai wa sai ten, Wa Sarabyin John Paul II hte Wa Sarabyin Benedict XVI ni mung Africa Mungdan ni de law law lang kawan gatsan ai lam galaw lai wa sai rai nga ai.
Kahtawlik Makam masham a daju hte hpung masha ni law malawng nga ai shara gaw Europa Mungdan ni raitim, Africa Mungdan ni gaw Kahtawlik hpung masha lawan ladan law htam wa ai Mungdan ni rai nna, , Nawku Hpung a matu myit mada shara kaba re ai lam America kaw na sawk shagawn wuhpung Pew Research Center kaw nna tang madun lai wa ma ai.
Ndai Africa Mundan ni hta masha jahpan laning hte laning manu mana law jat wa ai hte matsan masha ni law ai majaw malu masha, nga shara hte hpaji sharin na lam, tsi tsi lajang na lam ni hta mayak manghkang law law nga ai rai nna, Kahtawlik Nawku hpung kaw nna Tsi Rung Tsi Gawk hte Laika Sharin Jawng ni hpe gawgap ya nga ai hta n-ga, shingyim nauna garum ningtum ai lam hpe shaning shagu gumhpraw Dollar wan kaba jaw let madi shadaw ya nga ai rai nga ai.
Ref: BBC,CRUX
Thomas
![](https://kachin.rvasia.org/sites/default/files/cq5dam.thumbnail.cropped.1500.844.jpeg)
Add new comment