Majan Lapran Si Sum Sai Ni A Moi Mang Makoi Mayang Poi Lamng Galaw Lai Wa

2019 August shata 31 ya shani, Myen Asuya Hpyen Dap hte Dingdung Laknak Lang Rawt Malan Hpung (3) ni gap hkat ai ten, dum nta hta laknak hkrat ang ai majaw, mara kata asak si sum mat wa sai Kuthkai Ginwang Mawhit kaw na mare masha marai 5 a moi mang makoi mayang hpawng hpe, September 1 , laban shani galaw lai wa ma ai.

Makoi Mayang Poi de Kuthkai Ginwang kaw na Hpung Sara marai 36 hte shawa masha 1500 ram hte sa du akyu hpyi lawm ma ai lam chye lu ai. Kuthkai Mare hte ni ai Mare kahtawng hkan na Buga Hpung masha ni makoi mayang ai shara de sa du lawm na matu galaw ai raitim, pat shingdang da ai lam ni nga ai majaw n lu sa lawm lu ai lam buga masha ni tsun ai hte maren chye lu ai.

“ Kuthkai hte Kawng Hka Mare gaw deng 8 ram sha tsan ai, anhte Jawng ma dingsa ni kahkyin nna rau jawm sa na hku galaw ai, raitim Mare kataw kaw na n jaw pru ai, Mare kata de mung shinggan na masha n shang shangun ai, gate kaw na n lai shangun ai, dai hku mashelaw jahkrat da ai majaw lamang de n lu du ai hku re” nga nna Kawng Hka Mare na Sara Joseph Thein Aung tsun lai wa ai.

Moi mang tawn shara de, Kuthkai Jau Aseng na ningtau lithkam Wajau James Yaw Htung, Repration Mama ni, Sara Kaba Anhtony Hla Myit, Mungbawng Salang ni sa du kyu hpyi gawan ai lam galaw nna, makoi mayang lamang hta hpung masha ni law law sa du lawm ai lam chye lu ai.

Si sum mat sai ni gaw, shata 4 sha re ai ma Lasham Hkawn San hte Sumlut Htoi Ja (34 ning), Shy. Zahkung Nang Mun Pan (14 ning), Shd.Zahkung Zau Hkun Lat (9 ning) hte Su Mary Lu San (18 ning) ni rai nna, kaga marai masum mung laknak hkrat ai shaloi hkala hkrum ai lam chye lu ai.

Thomas

Ref: KBC Kachin