Amazone Maling Gaw Asak Daram Ahkyak Ai Nga Nna Wa Sarabyim Tsun Nga Ai shiga

“Amazon ginra hta hkru hkat nga ai sharaw wan kaba hpe yawng jawm shang lawm nna jawm shazim shamyit lam galaw ai rai yang, sat shamyit kau lu na re, Amazon maling gaw mungkan ga a sinwawp maling rai a majaw mungkan ga a matu asak daram ahkyak ai,” nga nna laban shani, shani ka-ang Angelus akyu hpyi woi ai aten, Wa Sarabyin tsun dat nga ai.

“2019 ning laman Brazil Mungdan hta sharaw wan hkru hkat ai lam, 77,000 lang daram byin ai, ndai gaw 2018 ning hta byin lai wa ai sharaw wan hta tsa htam shadang 85 daram law jat wa ai masa re, ndai sharaw wan hkru hkat lam malawng maga byin ai gaw Amazon maling hta re,” nga nna Brazil Mungdan asuya kaw nna tsun dat ai lam mung nga nga ai.

Amazon maling sharaw wan laja lana hkru hkat ai mabyin a shiga a majaw Mungkan Mungdan ningbaw ni law law kaw nna myit tsang ai myit hte Brazil Mungdan asuya hpe tsun mara shagun lam galaw nga ma ai rai nga ai. Brazil Mungdan gumsan magam hku nna mung, sharaw wan je na matu wan sat masha marai 44,000 jan hpe sharaw wan hkru hkat ai shara ni de sa da sai, Mungdan a hpyen hpung ni hpe mung wan je lawm na matu shangun dat sai lam Mungkan mungdan ni hpe tsun shana lam galaw dat nga ai.

Amazon ginra hta lawm nga ai Mungdan asuya ni yawng hku nna mung, UN Mungkan rap daw hte, Mungkan Mungdan ni yawng hku nna mung ndai Amazon ginra hta hkru hkat nga ai sharaw wan kaba hpe jawm sat lawm garum nna, Wa Sarabyin tsun ai mungkan a sinwawp maling, Amazon ginra hpe jawm hkye la ga nga nna Brazil  Mungdan Saradaw ni hku nna tsun lajin lam galaw dat nga ma ai.

#rvakachinservice#aungnanmkn.