UAE  Mungdan Na Shinggyim Nauna Committee Ningnan Hpe Wa Sarabyin Hkap Hkalum Hkrum Shaga

Shinggyim nau na myit grau maden zinghka jat wa hkra galaw sa wa na UAE Committee ningnan hpe hpaw ninghtan dat lu hkra n-gun dat shakut ai lam ni hpe shakawn shagrau chyeju dum let UAE Committee ningnan hpe Wa sarabyin Francis kaw nna hkap hkalum la dat nga ai.

Lai wa sai February shata hta, United Arab Emirates ngu ai UAE mungdan Grand Imam Muslim ningbaw kaba Al-Azhar Ahmed el-Tayyeb hte Wa Sarabyin Francis myit hkrum ta masat htu nna ndau shapraw da sai Human Fraternity ngu ai myit hkrum ndau laika hpe ta tut hkrang shapraw galaw sa wa na matu UAE Mungdan Muslim ningbaw ni lit la nna UAE Committee hpe hpaw ning htan dat ai lam rai nga ai.

Ta tut hkrang shapraw galaw sa wa na UAE Committee hpaw ning htan dat lu ai lam hpe chyeju dum shakawn shagrau ai lam bat langai, August shata 26 ya shani Wa Sarabyin tsun shapraw dat ai hta, “nju ndawng myit ga garan hkat lam ni, jahten shaza lam ni hpe chyu sha shiga shatai nna ka shabra ai lam ni hpe chyu sha shiga hku nna anhte na lu mu lu nga ga ai, makoi magap da hkrum nga ai mai kaja ai lam ni law law nga nga ai, makam masham uhpung shada da ta gindun nna, jawm bawng ban tsun shaga let hpu nau ni zawn tsawra hkungga hkat ai simsa ai Mungkan jawm gaw gap la lu mai ai myit mada shara lam ni nga nga ai,” nga nna Wa Sarabyin tsun dat nga ai.

Hpaw ning htan dat ai UAE committee hta Nawku hpung shada ganawn mazum lam the seng ai Nawku hpung ginjaw magam dap lit hkam Saradaw kaba Miguel Ayuso Guixot mung Committee malawm langai rai nga ai. Ndai Committee hku nna hpaji shapan shalat ya nga ai hpaji jawng ni hta makam masham hpung shada da hpu nau zawn mu mada ganawn mazum chye ai, simsa ai masa hte jawm bawng ban lam galaw chye ai hkaja lamang lai ladat ni hpe sawk sagawn lajang ya na rai nga ai, nga nna Vatican shiga dap kaw nna shana dat nga ai.

Source : Vatican News