Pran Wan Ladaw Laban 21 Ya Shani Na Karai Kasang A Mungga ( Year C, 2019)

CHYUM MUNGGA DAW 1 - ESAIA 66:18-21

CHYUM MUNGGA DAW 2 - HEBRE 12:5-7, 11-13

KABU GARA SHIGA - LUKA 13:22-30

Yerusalem mare de lung wa ai hkrun lam hta, lai sa wa ai mare kahtawng shagu hkan karai kasang a mung dan lam hte seng nna hkaw dan hkawm nga ai aten, hkye hkrang la ai de du mayu ai masha langai mi madu yesu hpang de sit sa wa nna, Madu e, hkye hkrang la ai kaw du ai ni gaw law ma ai kun i? nga nna sa san pru wa ai lam kabu gara ai shiga hta na la saga ai rai nga ai.

Tawra ai nu wa hpu nau ni, kalang lang anhte mung ndai zawn nga ai ga san ni hte shada jawm jahta ding lun hkan ai lam ni galaw chye ga ai. Kaja wa nga yang gaw, hkye hkrang la ai de du ai ni law ai nlaw ai lam ni hpe san htai lai hkan nna aten jahtum nga na malai, ngai hkye hkrang la ai de du lu hkra shajin nga sai kun? ngu ai ga san hpe madaw tinang a hkum hpe san yu na grau mai kaja nga ai rai nga ai. Hkye hkrang la hkrum ai ngu ai lachyum gaw, du wa na ra ai prat hta karai kasang hte rau ning ngai nga lu na, shi madu karai kasang hpe anhte a myi hte chyaw mu mada lu na, shi a karai asak hpe hkam la lu na hte dai zawn karai asak hkam la lu ai majaw kabu gara nga lu na, dai kabu gara ai lam ni mung bai tat jasum kau na tsang shara nnga sai hte, htani htana hkam la lu nga na masa de du wa lu ai hpe, hkyke hkrang la hkrum ai, ngu ai rai nga ai. Bai ndai hkye hkrang la hkrum ai ngu ai hte ning htan shai ai kaga maga mi de gaw, htani htana asak sum mat ai ngu ai mung nga nga mali ai. Htani htana asak sum mat ai ngu ai gaw, karai kasang a man de du tsap wa lu na ahkaw ahkang nlu mat sai hte, shi a karai asak hta kabu gara jawm pawng lu na ahkaw ahkang hpe mung tat shamat kau sai tha n-ga, dai zawn re ai ahkaw ahkang hpe htawm hpang de mung galoi bai nlu mat sana ngu ai masa de du mat wa ai lam rai nga ai.

Dai re ai majaw, sum sing lamu hte nga-rai mung ngu nna anhte tsun ga ai shaloi, shara ngu ai hta grau nna masa hpe ngu ai rai nga ai. Sum sing lamu mung dan ngu ai gaw karai kasasng hte rau jawm hpawng de nga lu ai masa rai nna, ngarai ngu ai gaw shi madu hte htani htana hka mat wa ra ai masa rai nga ai. Ndai bat na ja chyum mungga ni hta, hkye hkrang la hkrum lu mai ai lam ni hte seng nna tsun sharin ai hpe na la lu nga ga ai. Anhte shing gyim masha ni mahkra hkye hkrang la ai de du wa lu na matu, lam hpe karai kasang hpaw da ya sai raitim, dai hkye hkrang la ai de du na, ndu lu na ngu ai chyawm gaw, anhte hkum shagu daw dan la ai lam ni hte mung seng nga malu ai. Hpa majaw nga yang kadai shing gyim masha hpe mung atik anang galaw nna hkye la na matu Karai kasang galaw na nrai nga ai. Shi madu lajang jaw ya nga ai hkye hkrang la ai lam hpe hkap la na shing nrai ning dang kau na ngu ai lam hpe daw dan la ai lam galaw na gaw anhte madaw she rai na rai nga ga ai.

Bai, anhte gaw ndai uhpung hta shing nrai htaw ra uhpung hta lawm saga ai majaw teng sha hkye hkrang la ai de du lu sana re ngu nna mung kadai ntsun lu na ga ai. Ga shadawn, ga shaka ding sa prat hta hkye la madu a lam lajang na matu Iesarela masha ni hpe karai kasng lak san lata san da ai hte shanhte Israel masha ni mung karai kasang a lak san tsawra ai lam hpe hkam la lu lai wa ma ai rai nga ai. Raitimung, Israel amyu masha ni yawng hkye hkang la ai de du nna kaga chyasam tara mai gan masha ni yawng hkye hkrang la ai de ndu lu ma ai ngu nna kadai ntsun lu nga ai. Dai hte maren sha madu yesu du sa ai shaloi, Yuda makam masham a ning baw ning la ni rai nga ai Hparishe ni hku nna, shanhte gaw kaga ni hta grau chyoi pra san seng, tara shadik ai ni re majaw ndai shanhte a hparishe ngu ai uhpung hta lawm ai ni mahkra gaw teng sha hkye hkrang la ai de du lu na ni re ngu nna kam hpa nga ma ai ni rai ma ai. Ndai myit masa shanhte a baw hta rawng nga ai majaw, anhte na la lai wa ai sai kabu gara ai shiga hta na masha wa, hkye hkrang la ai de du lu ai ni nlaw ma ni, nga nna madu yesu hpe sa san pru wa ai rai nga ai. Shi a gan san a lachyum gaw, hparishe ni chyu sha hkye hkrang la ai de du lu na ngu ai gaw teng nga ai kun? ngu nna san mayu ai lam mung rai nga ai.

Madu yesu chyawm gaw “gyip ai chying hka hku shang lu na shaja mu” ngu nna htan ya lai wa ai. Lachyum gaw, Hparishe ni a uhpung hta lawm lu ai majaw shing nrai Israel masha tai lu ai majaw, shing nrai shi hte rau nga kaba wa yu sai ai majaw, shi a nta ding hku masha re ai majaw ngu ai lam ni a marang e sha hkye hkrang la ai de du wa lu na nrai, hkye hkrang la ai de du lu na matu gaw, tinang galaw shut kau ai lam ni hpe shagrit shanem ai myit hte myit yawn myit malai nga let karai kasang anhte hpe shatsam da ai lit magam ni hpe kang ka sadi dung ai let galaw gum hpai hkawm sa ai a marang e sha hkye hkrang la ai de du wa lu na re ngu nna htan ya ai lam rai nga ai. 

“Masha law law wa shang na tam ma ai rai tim mung, nshang lu ai nga na mara ai” nga nna mung madu yesu tsun ai majaw, hkye hkrang la ai de du lu na matu grai wa yak na rai kun, ngu nna mung ung ang shara nga mai nga mali ai. Raitim mung, ndai shara hta, Madu yesu tsun mayu ai lam gaw, hkye hkrang la ai de du lu na matu yak ai n yak ai ngu lam hpe tsun mayu ai nrai, hkye hkrang la ai de sa wa ai lam gaw gyip ai chying hka lam hte bung nga ai majaw, anhte a myit masin na shut hpyit mara ngu ai hte gum rawng gum tawng ai ngu ai lit shabawn kaba ni hpe hpai nna dai gyip ai chying hka hku lai di lu na matu shakut nga ai rai yang, nbyin mai na re, dai re ai majaw dai gum rawng gum tawng ai myit masa ni hte shut hpyit mara ngu ai lit shabawn ni hpe tawn kau, raw kau da lu yang sha hkye hkang la ai de du lu na re ngu nna sharin ai lam rai nga ai.

Bai, anhte hkye hkrang la ai de du wa lu na matu galaw ra ai magam bungli ni hpe larau ladaw lawan ladan rai galaw chye na matu mung sharin shadum da nga ai. Hpa majaw nga yang, dai hpe galaw gun hpai na aten ni gaw shadawn shadang hte re ai ladaw langai sha anhte lu ga ai majaw rai nga ai. Dai hkye hkrang la ai chyig hka anhte a matu la mat ai nhtoi du na rai nga ai. Anhte hkum shagu a si wa ai nhtoi gaw, dai chying hka la mat ai nhtoi rai na rai nga ai. Dai re ai majaw Jn 9:4 hta “ngai hpe shangun dat ai wa a magam amu hpe, shani nhtoi naw rai nga yang anhte gun hpai lu na rai nga ai, kadai mung amu n-gun nhpai lu ai, shana ahkying du na ra ai” nga nna madu yesu tsun ai lam mung nga nga mali ai.

Dai re ai majaw, tsawra ai nu wa hpu nau ni, shi a mung dan de anhte mung kan shing gyim masha ni yawng du shang wa lu na matu karai kasang ra sharawng nga ai hte maren dai magam a matu shi madu aten shagu nsim nsa shakut shaja nga ai rai nga ai. Ndai hkye hkrang la ai magam bungli ngu ai gaw karai kasang a magam bungli rai nga ai rai tim, anhte hkum shagu galaw gun hpai la ra ai anhte hkum shagu a kum htaw mung lawm nga mali ai. Dai anhte galaw ra ai anhte a kum htaw hpe anhte n-galaw ga ai rai yang hkye hkrang la ai de anhte ndu lu na ga ai. Anhte dai uhpung hta lawm saga ai ai majaw, jau re ai majaw, ma ma tai sai majaw, tara hkaw sara re ai majaw, jau gin wang a lit magam ni tha shang lawm gun hpai yu sai majaw ngu ai lam ni a marang e san san hte sha, hkye hkrang la ai de teng sha du lu sana re ngu nna kadai ntsun lu na rai nga ai. Ahkyak dik ai lam gaw, karai kasang myit ra ai lam ni hpe hkan galaw nga na, thing bu wa hpe tsawra daw jau nga na ngu ai lam ni rai nga ai. Mara hta len nga mayu ai myit masa ni gaw dai hkye hkrang la ai de du wa na matu ning dang kau ai lam tai mat lu nga ai.

Karai kasang a tsawra chye dik ai masin salum ngu ai gaw anhte a masin salum hta tsun ndang hkra kaba grau nga mali ai hte, shi a mung dan ngu ai mung anhte mung kan masha ni mahkra hpe malawm magawm di da lu ai du hkra dam lada kaba nga mali ai. Shi a mung dan de anhte du shang wa lu ai shaloi anhte wa mu mau lu ai lam langai mi gaw, tsun ndang hkra law la ai masha daw wa daw tsa hkye hkrang la ai de du nga lu masai ngu ai lam rai na rai nga ai. Dai hkye hkrang la ai de du wa lu sai masha jahpan ni gaw shani shagu jat nga ding yang rai nga ai hte dai jat wa ai jahpan hta anhte mung lani mi teng sha lawm lu na hpe myit mada nga let shi madu myit ra ai lam ni hpe hkan galaw shakut nga lu hkra matut shakut hkawm sa nga ga law.

Akyu hpyi saga: Wa karai kasang e, aten shagu galai shai nga ai mung kan ga ntsa hta, galoi mung n-galai shai wa lu ai na a tsawra ai myit hpe mu tam la lu na garum ya rit, shing rai na a tsawra chye dik ai masin salum hte tut e jawm hpawng nga let nang ndat da ai hkye hkrang la ai de du wa lu na matu lajang ya rit, anhte a madu yesu hkraitu a marang e hpyi nem nga ga ai.

By : Fr.Bernard Dashi Tang Ji