(36) Lang Na Alam  Wudang Bum Shagrau Poi Shabyin Shatai Komiti Hte Poi Lamang  Ni Hpe  Ndau Shabra

2019 Ning Alam Akyu Hpyi Wudang Bum (36) lang na Wudang shagrau poi, poi shabyin shatai Komiti hte poi mahkyen lamang ni Wudang Bum Yu Reng Komiti kawn shabra dat ma ai.

Wudang shagrau Poi galaw lu na matu, August shata 12 ya shani hte 17 ya shani, Aung Nan Htap Masum Hpawng Htingnu hta, Myitkyina Sasana Sagurem wa  Wa Saradaw Francis daw tang hte Tanghpre, Shatapru, Myitkyina Ginwang up Jau ni, Wudang Bum lit hkam Jau hte yu reng Komiti ni, Kanu Kawa Sara ni, Hpung salang ni hte Num, La, Ramma hpung ni, Nawku hpung na uhpung uhpawng ni bawngban jahkrup zuphpawng galaw ngut ai hpang ya na zawn poi lamang hte seng nna masat shagrin shabra dat ai rai nga ai.

Dai hte maren, (36) lang na Alam Wudang shagrau poi hpe, du na September 13,14 (bat manga ya, kru ya) lahkawng ya galaw na rai nna, shawoi shaning na zawn Nawku Dawjau Missa lamang, Rosary hti Wudang gawan akyu hpyi ai lam ni hpe Bum lagaw hte Bum ntsa shara lahkawng kaw galaw mat na re ai lam, August 12 ya shana hpaw hpang Missa hpe Bum lagaw hta  shana 5:00PM, Bum ntsa hta 7:00PM ten ni hta nga na re ai lam chye lu ai.

Alam Akyu Hpyi Wudang Bum hpe woi awn gaw de hpang ai Wajau Paul Lasang La a Jau prat (50) ning hpring Jubali masat shagrau Missa hpe mung 14 ya shani 11:00 AM ten na Missa hta nawng ya na re ai lam chye lu ai.

Wudang shagrau poi sa hpung shawa masha ni a hkam ja lam a matu Nawku Hpung Hkamja Dap (CHAD) hte Hkamja Dap Commision ni shara masum masat let tsi lajang sa wa na re ai lam, shimlam a matu Tanghpre, Shatapru, Myitkyina Jau Ginwang na pat jasan ni shanglawm let lit la mat wa na re ai lam chye lu ai.

Malu masha a matu shat makai  ni hpe Myitkyina Jau Ginwang kawn lit la let Bum lagaw hta shat kada makai langai 1500Ks, Bum ntsa hta 2000Ks  hte Bum Lapran hkan mung dut  shabra ya na re ai lam, Mawdaw langai ap manu 1500Ks hte Cycle langai 1000Ks hta nna lit la yu reng mat wa na re ai lam chye lu ai.

Wudang shagrau poi hpe kabu gara awng dang ai hte galaw lu na matu September shata praw kaw nna Nam hkyen jasang jaseng ai lam ni hpe galaw mat na re ai lam chye lu ai.

Ndai Alam Wudang shagrau poi hpe lai wa sai 1983 ning kaw nna Myitkyina Sasana kawn   shaning shagu galaw ai rai nna, Jinghpaw mung shara shagu hkan na Kahtawlik hpung masha ni sha n-ga, kaga Hkristan hpung masha ni hte hkristan n re ai ni mun kaba sa du akyu hpyi bumlung ai lam galaw ai poi kaba langai mi rai nga ai.

Missa Hkungga  Nawku Dawjau Lamang Ni

12/9/2019 (bat 4 ya)          

Hpaw hpang Missa         

- Bum lagaw 5:00PM

- Bum ntsa 7:00PM

13/9/2019 ( Bat 5 ya)  

 Bum Lagaw/ Bum ntsa           - 7:00AM

                                                           11:00AM

                                                            8:00PM

14/9/2019 ( Bat 6 ya)

 Bum Lagaw/ Bum ntsa         -   7:00AM

                                                           11:00AM

*Poi nhtoi rai nga ai 13 ya shani Missa 3 lang, 14 ya shani 2 lang galaw na.

By : Thomas