San Pra ai John Marie Vianney A Poi Nhtoi Shani Jau Ni Hpang De Wa Sarabyin Chye Ju Dum Laika Ka Shana 

Yak hkak ai lam ni law law hte myit daw myit hten ai lam ni law law a lapran shani shagu Sacramentu ni hpe jaw ya let, hpung masha ni hpe lakawn ya nga ai majaw Jau ni yawng hpe chyeju dum nga ai, nga nna Wa Sarabyin Francis laika ka shana dat nga ai.

August shata praw 4 ya shani ang ai, Jau ni yawng hpe makawp maga ai San Pra ai John Marie Vianney a poi nhtoi shani hta lahta na zawn Wa Sarabyin Jau ni yawng hpang de laika ka shana dat ai lam rai nga ai.

Lam magup hpe kau da nna, aput angun nnga ai sha, azim rai nga nna ap nawng shakut nga ai Jau ni yawng hte myit hpawm nga ai lam madun na matu hte, n-gun jaw mayu ai yaw shada ai lam hte ya na zawn Wa Sarabyin laika ka shana dat ai lam re hpe chye lu ai.

Wa Sarabyin a laika hta, “myit hkyi pu ba ai lam ni, machyi makaw hte myit ru tsam pu lam ni law law a lapran, pyaw hpa lam ni nlu la hkra raitim, Karai Kasang hte Karai kasang a amyu masha ni hpe daw jau ai sasana magam bungli ni hpe gun hpai shaja nga ai nanhte Jau ni langai hpra hpe chyeju dum ai lam tsun mayu nngai, yak hkak ai lam ni law law a lapran, Jau prat a kaja dik ai laika man ni hpe ka jahpring nga ma ai ni nanhte rai nga myit dai,” nga nna Jau ni yawng hpang de shana dat ai laika hta Wa Sarabyin ka dat nga ai.

Jau ni galaw shabyin ai myit kataw hpa magam bungli ni a majaw Nawku hpung hta byin pru ai hkra machyi lam ni hte seng nna mung Wa Sarabyin a laika hta ka shalawm da nga ai.

“Jau manang ni galaw shabyin ai myit kataw hpa magam lam ni nga nga ai ngu ai lam hpe yin la nga ga ai, rai timmung, ndai zawn re ai lam ni nga nga ai ngu ai a majaw, kaja wa tinang a prat hpe ap nawng nna sasana magam bungli hta shakut shaja nga ai Jau ni hpe chyeju dum ai shakawn shagrau ai ga ni nstun ai rai yang nrap ra na re, shawang tsawra myit kaba the masha law law a akyu a matu matsan dum lama ai magam bungli ni hta ap nawng shakut shaja nga ai Jau ni hti ndang hkra nga nga ai, nkau mi nga yang tinang a asak hpe gyam sat kau ya na tsang shara nga nga ai masa ni a lapran hta shakut ap nawng nga ai ni mung law law nga nga ma ai. Gaya hkrum lam ni the hkra machyi lam ni byin pru nga ai ndai prat masa aten hta, nanhte gaw Kabu gara ai shiga a matu nanhte a prat hpe kabu gara ap jaw nga ai ni rai myit dai, myit ndaw nhten ai sha matut shakut nga ga, Madu gaw shi a ningrum ningtau nawku hpung hpe shachyoi shapra nga na re,” nga nna Wa sarabyin ka dat nga ai lam Vatican shiga dap kaw nna shana dat nga ai.         

Source:Vatican News