Hka Tsin Yam Hkrum Nga Ai India Mungdan Masha Kawn Hpe Nawku Hpung Ni Garung Ningtum Jaw Ya

Marang laja lana htu ai majaw tsin yam hkrum sha nga ai India Mungdan Assam Mungdaw na hka tsin yam hkrum masha ni hpe Nawku hpung hte seng ai uhpung uhpawng ni kaw nna garum ningtum lam ni lawan ladan galaw ya nga ai lam chye lu ai.

 Hka tung hka lim wa ai majaw nlaw htum masha marai 15 si hkrum lai wa masai hte, dum nta ni hka lim mat wa ai majaw masha wan 4 jan mung dum nta kata byin hkrum nga ma ai.

“Ndai laman marang matut manoi laja lana htu nga ai majaw, Assam Mungdaw na mare hkying 4 jan hka lim nga ai hte, Brahmaputra ngu ai hka nu kaba mung tsang ra ai hka shadawn shadang madang lai hkra hka kaba nga ai. Sharut gyi ai hte hka tung hpunla ni hta yawng lawm mat nna asak si hkrum sai masha marai 15 rai nga sai, tsin yam dabang 200 jan hta hka tsin yam hkrum masha mun 8 jan hpe sit bang shara jahkrat da ya sai, ndai tsim yam hkrum masha ni hpe garung ningtum uhpung ni kawn lit la yu lakawn ya nga ai”, nga nna lit nga ai mung up du asuya salang ni tsun dat nga ma ai.

Garum ningtum uhpung ni hpe mahkri shaw lam galaw ya nga ai  Jau kaba Varghese Velickakam tsun ai hta gaw, “Caritas India uhpung kaw nna garum ningtum lam ni galaw hpang nga sai, saradaw ginwang garum ningtum uhpung ni hte jawm mahkri shawn nna galaw nga ai, hkyak hkayk ra nga ai lu lang hka hte malu masha ni hpe lajang garum ya nga ai zawn, tsin yam hkrum masha ni a matu aten galu garum ningtum masing ni hpe mung jahkrat galaw hpang nga sai” nga nna tsun dat nga ai.

Ya na zawn hka kaba sharut gyi ai lam ni a majaw byin pru ai ahtu hkra machyi lam ni gaw mi kaw nna ahtu hkra machyi lam ni law law nga nga sai,Assam mungdaw a matu grai nan kaba la nga ai. 1954 ning kaw nna rai yang, hka a majaw gyi mat ai sharut gyin shara ni gaw Assam mungdaw hta Hectare sen 5 daram rai nga sai, ndai shadawn shadang gaw Assam mungdaw lamu ga a tsa htam shadang 7 daram rai nga ai, sharut gyit ai hta mare kaji kaba law law mung gyi lawm mat sai rai nga ai, ng anna Ucan shiga dap internet laika man hta ka shana da nga ma ai.              

Source:ucannews