Mali Hka Kaba Wa Ai Majaw Mung Masha Nkau Ni Hka Hpyen Tsinyam Hkrum

 Written by Thomas

Daining na lanam ta ten, July shata praw kaw nna, hka hku mung maga marang matut manoi htu nna Mali Hka hte Nmai hka kaba wa ai majaw  Jinghpaw Mung Mali hka nu makau  hkan nga ai Mare ni hte  n-ga nem ai Myu Mare Lawk hkan hka shang wa ai nna Myitkyina hta Mare hting gaw hkying lahkawng jan (2793) hte masha mun mi hkying mali jan (14846) hka hpyen tsin yam hkrum sha lai wa ma ai.

July shata praw 10 ya shani kawn, mali hka kaba rawt jat wa ai rai nna, July 12 ya shani gaw Jinghpaw Mung, Myitkyina Mare kaba a hka lim na tsang ra ai shadawn madang hpe lai nna Centimeter 1234 du hkra rawt wa ai majaw, n-ga nem ai lawk ni rai nga ai Mali Yang, Ziun IDP Camp, Rampu, Chyet Pawng Shan, Myit Thit Gyi hte Shatapru Lawk nkau de hka shang wa ai re lam chye lu ai.

Hka kaba wa ai majaw nkau ni Jinghku jingyu ni a nta hkan, Nawku Jawng, Buhdah Bunggyi Jawng hte Asuya kawn lajang da ai hka hpyen koi yen camp ni  hta shanu shingbyi koi yen lai wa ma ai. Myitkyina kaw hpyen koi yen dap 31 hte Sinbu kaw 2 hpaw tawn da ai lam chye lu ai.

“ July 9 ya shana kawn, hka shang hpang wa ai, dai shaloi gaw hkawm wa hkawm sa naw ma ai , 12,13 ya shani hkan gaw n mai lai sai, nta npu htap yawng lim mat ai, masha sinda du ai , rai ni chyawm gaw n tsa htap kaw yawng majaw nna palastic Muga ( မုိးကာ ) hte magap da ai, rai mat na tsang majaw shana daw anhte nta masha ni kahti galai yup sin ai, ahkyak yang garum hpyi na matu seng ang ai ni a phone numbat ni mung la da ai, bai nna hka yawm wa ai kun, jat wa ai kun mung jahkring hkring sa yu ai, facebook kaw na shiga ni hpe mung aten tup hkan yu ai“ nga nna Shatapru Htunghking Gingsup Pa makau kaw shanu nga ai Zetang Dau Hkawng shan hte nta hka lim ai lam hte seng nna  tsun lai wa ai.

Manmaw Mare kaba hta mung July shata 15 ya shani kawn Mali hka kaba wa nna Sin Kone lawk, Mahadi Lawk, Khunta hte Tat Kalay Lawk ni hta hka shang wa ai majaw garum kahtau lam ni ra kadawn nga ai lam BBC shiga dap facebook lai ka man kawn July shata 16 ya jahpawt ka mara da ai hte maren chye lu  ai.

Marang matut manoi htu sawng ai majaw Hka Shi Hka nu ni tung kaba wa nna Hka Hku Mung ginra Salang Yang, Ndup Yang  hpyen yen dabang ni hta July 12 ya, yup tung laman hta dabang kata de hka lim nna Dum nta, Wa lawng hte Nam Dum ni mung hten za mat ai lam ni byin ai lam, Ndup Yang hpyen yen dabang na Nhtan Hka mahkrai (2) mung hten hkrum mat nna marang htu sawng ai majaw Myitkyina-Sumpra Bum-Putao Mawdaw lam kaba mung Ga gyi ru wa nna hkawm sa hkawm wa yak hkak nga ai lam hte Mali Hka mayan Layen Mare kaw mung hka lim shang wa ai majaw dum nta gat seng 20 jan lawm mat ai lam, Putao maga de mung Putao-Hkawnglang Hpu-Nawngmun Bum lam rai nga ai Ratbaw hte Lunghka Sumri mahkrai ni hka kaba ai hta lawm mat sai lam  na chye lu ai.

Ya na zawn hka kaba wa ai majaw, Myitkyina Ginwang kata kaw nga ai Jawng n kau ni mung hka kaba ai laman pat da ra mat ai lam, n dai lam hte seng nna Mare Uphkang Du U Than Win kawn

 “  July 17 ya shani Myitkyina kaw pat dat ai Jawng masum mali ram bai hpaw na re, Sinbu hte Ta Law Gyin maga de na jawng ni gaw hka n hkyet shi ai re majaw manga ya ram naw lat ra na re” nga nna  Kachin Time shiga dap de tsun da ai hte maren chye lu ga ai.

Dai hte maren, Jinghpaw mung asuya kawn mung, hka hpyen tsin yam hkrum masha ni hpe alu ja gumhpraw sen 500 ram hte n dai July shata 15 ya kaw nna 17 ya laman garum madi shadaw ai lam galaw mat na rai nna, hka tsep kawp hkyet mat ai hpang mung bai gawgap gram lajang ai lam ni hta garum madi shadaw mat na re ai lam chye lu ai.Kaga NGO htedinghkrai alu madu ni mung hka hpyen tsin yam hkrum masha ni hpe garum madi shadaw ai lam, Buga Ramma ni kawn rai ni htawt sit garum ai lam ni galaw ya nga ai lam chye lu ga ai.

Hka kaba ai lam hpe koi yen lu na matu, Jinghpaw Mung asuya kawn 2019-2020 ning laman Mali hka kau mayan hka madin shadaw ni galaw mat na matu lajang nga ai lam mung chye lu ai.

Myen mung madang hku nna dai ning na marang ta  laman ta hta Mali Hka, Shin Twi Hka hte Tsit Tawng hka ni kaba wa ai majaw Jinghpaw Mung na Myitkyina, Manmaw, Kata ,Sinbu, Shwbu,Tabik Chin hte Hkang Mung kaw Hkamti, Humilin mayan hte Yahkai Mung ni hta hka hpyen tsin yam hkum ai mare ni law law nga ai lam matut nna hka naw kaba wa na re majaw Hka nu mayan hte n-ga nem ai shara hkan nga ai ni grai sadi maja let nga na matu Myen Mung Lamu Marang masam dap kawn july shata 15 ya shani n dau shana da  nga ma ai .

Myitkyina kaw lai wa sai 15 ning , 2004 ning hta kalang, 1997 ning hta kalang, 1979 ninghta kalang, ya na zawn tsang ra ai madang hta lai nna Mali hka kaba wa ai majaw Mare kata  hka lim ai lam byin lai wa sai rai nga ai.

Source: Kachin Time, BBC, Kachin Net, RVA Kachin, RVA Rawang