Nawku Makam Masham Hpung Ni Hpe  Sha-ang Nna Jahkrit Shama Jahten Sharun Lam Ni Galaw Ai hpe Gara Hku Matai Htang Na

25 June,2019

Nawku hpung, makam masham uhpung ni hpe sha-ang nna galaw nga ai, jahkrit shama jahten sharun lam ni hpe ning hkap gasat lam galaw ai hta, hkam sharang ai lam, yawng jawm shang lawm ai lam ni galaw na matu Vatican tsun shadut dat nga ai. UN mungkan radap hte seng ai Vatican dingrun dat kasa Saradaw kaba Bernardito Auza kaw nna, June 24, bat langai ya shani, New York, UN Mungkan rapdaw hta tsun shaga ai mungga hta lahta na zawn tsun dat ai lam rai nga ai.

Saradaw kaba tsun ai hta, “Jahkrit shama jahten shaza adawt kasat lam galaw ai mang hkang lam ni hte seng nna mahtai tam ran hparan ai magam lam hta anhte yawng shang lawm ra ga ai. Sri Lanka Mungdan hta byin lai wa sai, Nawku ku nga ai aten bawm kabaw bun ai majaw masha law law si hkala hkrum lai wa ai mabyin hte hpawn, Jews, Muslims, Christians hte kaga makam masham uhpung ni hpe sha-ang nna galaw nga ai jahten shaza adawt kasat lam ni hpe, Mungdan asuya ni kaw nna tsun ning hkap ai ga ni tsun shaga ai hte sha nram nga ai, tinang a mungdan mung chying sha ni hpe makawp maga la na lit mung up du asuya ni hta nga nga ai zawn, hkam sharang chye ai myit lai masa ni, simsa ai hte rau jawm shanu nga pra chye ai myit lai masa ni mung chying sha ni a myit masin hta rawt jat bawng ring wa hkra shapan shalat ai lam ni hpe mung asuya ni glaw na ra nga ai” nga nna saradaw tsun dat nga ai.

Hkam sharang chye ai myit lai masa ni, simsa ai hte rau jawm shanu nga pra chye ai myit lai masa ni mung chying sha ni a myit masin hta rawt jat bawng ring wa hkra gara kaning rai galaw mai ai, ngu ai lam hte seng nna Saradaw kaba hapji jaw ai hta, “Tinang a myit hta rawng ai lam hpe wang lu wang lang tsun shapraw lu na ahkaw ahkang, makam masham hte seng ai wanglu wang lang nawku kam sham lu na ahkaw ahkang lam ni grau grau dam lada wa hkra gaw gap ai lam ni galaw ya ra ai, ya mungdan nkau ni hkan myit npyaw hpa mu mada lu nga ai lam gaw, mungdan a malawng maga nawku kam sham ai makam masham uhpung kaw nna nlaw ai kaga makam masham uhpung kaji ni hpe, adip ari di ai, dip gamyet da ai lam ni galaw ai mabyin ni nga nga ai. Mung chying sha ni yawng kaw nna makam masham amyu baw sang ging hka ai lam nnga ai sha maren mara, rap ra ai ahkaw ahkang ni lu la hkra mung up du asuya ni kaw nna lit la galaw ya marit” nga nna UN mungkan radap hte seng ai Vatican dingrun dat kasa Saradaw kaba Bernardito Auza kaw nna tsun lajin lam dat nga ai lam Vatican shiga dap kaw nna shana dat nga ai.         

Source: Vatican News