Mandalay Kahtawlik Sasana Hta, Saradaw Nnan Shatai Poi Hte Ginwang Up Saradaw Magam Lit Up Poi Galaw 

22 June 2019, Mandalay

Mandalay Sasana na Msgr Mark Tin Win a Ginwang Up Saradaw aya tang poi hte Mandalay Kahtawlik Sasana Saradaw magam up ya ai poi hpe June shata 19, lai wa sai laban shani Mandalay Yesu a Salum Ningsang Cathedral Nawku Jawng kaba hta galaw lai wa sai rai nga ai.

Saradaw shatai poi hta, Vatican kaw na Sarabyin a dakkasa rai nga ai Asia Saradaw kaba Paul Tschang InNam, Yangon Saradaw Kaba Cardinal Charles Bo, Mandalay Ginwang  Hkringmang Daju Dr Zaw Myint Maung hte Asuya mu gun salang ni, Myen mung Kahtawlik sasana ginwang 6 kaw na Saradaw ni, Jau ni, Ma Ma  ni, Brother ni hte hpung masha Kanu kawa ni hte kaga makam masham hpung kaw na myit su kanu kawa ni shang lawm lai wa ma ai.

June shata 22 ya shana daw hta  hkap tau hkalum hte hpaw poi lamang galaw ai hta, Saradaw kaba Nicolas Mang Thang, Cardinal Charles Bo hte Mandalay hkingmang daju Dr Zaw Myint ni kaw nna laidi sumri rep let poi hpe hpaw dat ai hpang, Saradaw Nicolas Mang Htang hte Cardinal Charles bo yan kaw nna hkap tau hkalum mungga shaga ai lam galaw lai wa ai.

Mandalay Ginwang hkringmang daju Dr.Zaw Myint Maung kawn, “Dai ni mungkan hta hkum hkrang marai ningja ni grai galu kaba nga sai hte gin shalat hpung tang hpaji ni grai madang tsaw nga sai rai tim, dai hte sha Mungkan ga hpe simsa lu hkra galaw na n mai nga ai.Marai hkumding dek shagu a myit masin Wenyi hte seng ai  lam ni mung galu kaba wa ra ai, shada da hkungga manu shadan tsawra hkat nga ra ga ai, n dai lam ni kunghpan wa na matu gaw masham nawku hpung Saradaw ni shakut nga ma ai re ngu nna hkam la ai.Dai re majaw anhte Myen Mung sha n-ga Mungkan simsa wa na matu Saradaw ni hta mung lit nga nga ai, ya n dai zawn Saradaw langai hpe aya tang ya ai poi lamang galaw lu ai gaw grai kabu  hpa re” nga nna tsun lai wa sai.

Dai hpang Asuya magam gun ni hte Saradaw ni hpe alu madu ni kawn kumhpaw kumhpa jaw ya ai lam ni galaw nna Myen htunghking ka hkrang ni hte mung ka manawt shangwi shapyaw dan lai wa ma ai.

June 23 ya laban jahpawt kying 7AM ten Saradaw aya tang ai Missa galaw ai hta Myen mung Saradaw kaba Cardinal Charles Bo kawn Karai Mungga htawn tsun ya lai wa sai.

Saradaw hkaw tsun ai hta ‘ahkyak dik htum gaw tinang hkum hpe tinang kam ai hta Madu Yesu gaw nang hpe grau nna kam ai lam, madu hkum madu tsawra ai hta, Madu Yesu a tsawra myit gaw grau htum ai lam, dai majaw tinang a prat hkrum lam hta Madu Karai Kasang hpe tam ra ai lam, tinang hpe lam madun ya ai wa gaw masha n re ai Karai Kasang langai sha re ai lam’ Mungga hkaw tsun lai wa sai rai nga ai.

Missa hpe Saradaw nnan shaman ai hte shangut la ai hpang Saradaw aya hkam la sai Mark Tin Win kaw nna mung chye ju dum mungga shaga la sai.Matut manoi rai nna Saradaw nnan hpe hkap tau hkalum shagrau ai lamang hpe mung galaw lai wa sai.