Madu Yesu a Hkum hte Sai Poi N htoi Laban Shani Na Karai Kasang a Mungga

Chyum Laika Ni

Chyum Mungga Daw I - Ningpawt Ninghpang Laika 14:18-20

18 Tsaw Htum ai Karai Kasang a hkinjawng rai nna, Salem hkawhkam tai nga ai Melhkizedek mung Abram hpang de muk hte sabyi la sa ya nna, 19shi hpe shaman ya let, “Sumsing lamu hte ginding aga hpe hpan da ai dai Tsaw Htum ai Karai Kasang gaw Abram hpe shaman ya u ga! 20Na a gumlau hpyen ni a ntsa e, nang hpe awng padang jaw ya ai dai Tsaw Htum ai Karai Kasang gaw a nga u ga law!,” nga nna tsun ai. Abram mung shi lu la sai arai mahkra a htam shi hta na htam mi hpe Melhkizedek a lata hta jaw ya wu ai. 

Chyum Mungga Daw II - 1 Korinhtu 11:23-26

²³ Kaning rai nme law, ngai nanhte hpe ap da ma de ai gaw, dai Madu kaw na ngai hkam la se ai: dai gaw, Madu Yesu gaw ap kau hkrum ai shana e muk la nna, ²⁴ shakawn ngut jang, ahkyep alep nhtawm, Ndai gaw nanhte a matu mara nye a hkum rai nga li ai; ngai hpe a dum nga na matu ndai galaw mu, ngu nna tsun mu ai. ²⁵ Dai hte maren, shana shat sha ngut jang, dai gawm hpe mung shi la nhtawm, Ndai gawm gaw nye a asai hta gaw da ai ga shaka nnan rai nga ai; nanhte galoi mung lu yang, ngai hpe a dum nga na matu ndai galaw mu, ngu nna tsun mu ai. ²⁶ Kaning rai nme law, nanhte galoi mung ndai muk sha nna ndai gawm lu nga myit yang, dai Madu a si hkam ai lam, shi bai du ai du hkra, nanhte tsun shana ya myit dai.

Kabu Gara Ai Shiga - Luka 9:11-17

¹¹ Shawa masha ni mung dai hkan chye jang, shi hpang de hkan sa ma ai rai nna, shanhte hpe hkap la nhtawm, Karai Kasang a mungdan lam shanhte hpe hkaw dan nna, machyi mai mayu ai ni hpe shamai ya mu ai. ¹² Ya jan du wa magang nga ai: dai rai nna sape shi lahkawng gaw sit sa nhtawm, Dai shawa masha ni hpe grup yin hkan na kahtawng ni hte htinghkrai hkan e wa yup nna lusha tam sha mu ga, shabawn dat u: anhte gaw ya nam e she rai nga ga ai, ngu nna shi hpe tsun mu ai. ¹³ Shi gaw, Nanhte nan shanhte hpe sha na jaw mu, ngu nna, shanhte hpe tsun mu ai. Shanhte gaw, Ndai masha nlang sha na lusha anhte n sa mari yang gaw, anhte kaw muk manga hte nga lahkawng hta kaga hpa mung n nga ai, ngu mu ai: kaning rai nme law, lasha hkrai hkying manga daram rai nga ai. ¹⁴ Shaloi shi gaw, Ndai ni hpe hpung mi hta manga shi shi daram di nna, hpawng dung nga shangun mu, ngu nna shi a sape ni hpe tsun mu ai. ¹⁵ Shanhte mung shing di nna, nlang hte hpe dung nga shangun mu ai. ¹⁶ Shaloi shi gaw dai muk manga hte nga lahkawng hpe la nna, lamu de mada yu let dai hpe shaman nhtawm,ahkyep alep di nna, shawa masha ni hpe hkan tawn jaw na matu shi a sape ni hpe jaw da wu ai. ¹⁷Shaloi dai ni sha nna nlang hkru kat ma sai: shanhte a angaw angam adaw ahkyep hkan hta lahkawn la yang, mung shi lahkawng hpring dem naw rai nga ai.

Bible Source : Link 1  , Link 2